LADC hnuaia Village Council inthlan zawhfel a ni

Lai Autonomous District Council (LADC) huamchhung Village Council (VC) 98-a Inthlanna chu tluang taka zawhfel niin ZPM chu party mal-a Seat leh VC la tam ber an ni.

LADC hnuaia Village Council Inthlanpui hi niminpiah khan VC 99-ah neih tura ruahman a ni a, VC 99 zingah hian 46-Hmawngbuchhuah VC-ah chuan inthlan chuh tura hming pelut te endikna (scrutiny) paltlang zo an awm loh avangin inthlan buatsaih a ni lova, hei vang hian VC 98-ah Inthlanpui hi kalpui a ni. Heng VC 98-ah hian a duh apiangin an chuh theih General Seat 492 leh hmeichhe tana hauh bik Reserved Seat 98, a zavaiin seat 590 a awm a, Inthlan chuhtu Candidate zawng zawng hi 1,511 niin General Seat-ah 1,259 leh Reserved Seat-ah 252 an ni a, Bharatiya Janata Party (BJP) in Candidate 24; Indian National Congress (INC) in Candidate 300; Mizo National Front (MNF) in Candidate 438; Zoram People's Movement (ZPM) in Candidate 549 leh Independent Candidate 200 an awm a ni.

He Inthlanpui-ah hian ZPM Party chuan General Seat 246 leh Reserved Stae 43, a vaia Seat 246 lain VC 38-ah hnehna an chang a, party mal-a Seat la tam ber leh VC la tam ber an ni a. MNF chuan seat 192 lain heng te hi General Seat 162 leh Reserved Seat 30 niin VC 25-ah hnehna an chang a; INC chuan seat 102 lain General Seat 89 leh Reserved Seat 13 niin VC 12-ah hnehna an chang a; BJP chuan General Seat 7 lain VC siamna an nei lova; Independent Candidate-te'n Seat 43 lain heng te hi General Seat 31 leh Reserved Seat 12 a ni a, VC pakhat-a Seat zatve aia tam lakna VC pakhat an nei a; party mala VC din thei (majority) awm lohna VC 22 a awm bawk.

LADC hnuaia VC Inthlanpui-ah hian 29-Saikhawthlir VC-a seat 5 awmah chuhtu 5 (INC 1 leh ZPM 4) awmin khingtu dang an awm loh avangin inthlan buatsaih ngai lo (uncontested)-a tlinga puan an ni a. 37-Karlui-I, 38-Karlui-II leh 51-Sabualtlang VC-ah te chuan Reserved Seat-ah chuhtu pakhat theuh (ZPM Candidate 2 leh MNF Candidate 1) awmin khingtu awm lo (Uncontested)-a tlinga puan an ni bawk a. Inthlan vote thlak hi VC 97-a seat 582 (General 488 leh Reserved 94) atan kalpui a ni.