Mizoram State Library tlawhtu zingah zirlai an tam

Sawrkar kum liamta 2023-24 chhung khan Aizawl-a Mizoram State Library tlawhtu 6110 awmin chung zinga 3048 chu zirlai an ni.

Mizoram State Library-a State Librarian Zarzoliani sawi danin tun dinhmun ah Mizoram-ah Sawrkar Public Library 5 awm mekin NGO in an enkawl YMA Library 512 a awm bawk a. Sawrkar kum liamta 2023-2024 chhung khan Mizoram State Library bik tlawhtu 6110 awmin chung zinga 3048 chu zirlai an ni a, General vistor 2981 awmin Research Scholar 81 tlawhtu an awm bawk a ni. Kumin May thlaa lehkhabu hawh zat chu 386 niin chung zinga 353 chu puitling lehkhabu niin naupang lehkhabu 33 hawhchhuah a ni bawk a. May thla chhung vek khan Member inziaklut thar 68 awmin chung zing 63 chu puitling an ni a, naupang 5 an inziahluh belh bawk.

Mizoram State Central Library-a State Librarian Zarzoliani chuan eizawnna kawnga hlawhtlingte chu Library tlawh thin te leh lehkhabu chhiar ngainatute an ni tih sawiin, tunlaiah intlansiakna a nasat tawh avangin hlawhtling a dingchhuak tur chuan lehkhabu chhiar nasat a pawimawh thu a sawi a. Mizoram State Library a lehkhabu awmte chu mitinin chhawr tangkai tum a pawimawh tih sawiin, tun dinhmunah lehkhabu 72,176 a awm thu leh lehkhabu zinga 5842 chu naupang lehkhabu niin Hindi Lehkhabu pawh 17,327 a awm thu a sawi a, tunah hian Mizoram State Central Library-ah lehkhabu 72176 hawh theihin a awm mek thu a sawi bawk.