ZMC tana Special Package atangin 1st instalment cheng vbc. 170 pechhuak thuai dawn

Union Health Minister JP. Nadda chuan Zoram Medical College (ZMC) tana Special Package dilna thehluh tawh atanga 1st Installment cheng vbc. 170 chu pekchhuah thuai a nih tur thu Chief Minister Lalduhoma a hrilh.

Chief Minister hian Zirtawpni tlai khan Union Health Minister hi a Pisa-ah hmuin, Zoram Medical College (ZMC) tana Special Package dilna thehluh tawh atanga 1st Installment, cheng vbc. 170 pekchhuah thuai anih tur thu a lo hrilh a. ZMC tihchangtlun zel dan tur leh Health Sector-a Mizoram hmasawn dan tur kawng hrang hrang an sawidun bawk a ni.

Chief Minister hi Mizoram mamawh hrang hrang thlenin Delhi-ah a zin a, sawrkar laipui a Home Secretary Ajay Kumar Bhalla pawh a Pisa-ah hmu nghalin, Home Secretary chuan Cyclone Remal avanga Mizoram in chhiatna hrang hrang a tawrh a chhawmdawlna tur cheng vbc. 21.64 chu SDRF hnuaiah pekchhuah a nih tawh thu leh 2nd Installment pekchhuah thuai a nih tur thu a lo hrilh a. Mizoramin Security Related Expenditure (SRE) hnuaia sum a dawn ve ngai loh chungchang pawh CM hian sawiin, Home Secretary hian bawhzui a lo intiam a ni. Raltlan enkawlna tura mamawh hrang hrangte leh chhawmdawlna pek tur te a thlen bawk a, Home Secretary hian an bawhzui tur thu a lo hrilh bawk. 

Lalduhoma hian Parliamentary Affairs and Minority Affairs Minister Kiren Rijiju pawh hmuin Mizoram mamawh hrang hrang te a thlen a, Kiren Rijiju chuan PMJVK hnuaia Project hrang hrang 65 te chu a theih anga tihhlawhtlinsak ngei lo tiamin, Project pending mek leh Project thar chungchangte pawh an sawidun a. Chief Minister hian Parliamentary Affairs Minister a nihna angin Mizoram atanga Lok Sabha MP awmchhun Richard Vanlalhmangaiha chu NDA ni lo, INDIA pawh ni lo tana thutna tur lo ngaihtuahsak turin Kiren Rijiju hi a ngen a. Mizoram MP hi House chhunga thusawina hun tam thei ang ber pe turin a ngensak bawk. He ngenna hi Union Minister hian bawhzuisak a lo tiam a ni. Chief Minister hian Minister of DoNER Jyotiraditya Scindia leh External Affairs Minister Dr. S. Jaishankar te pawh a kawm bawk a ni.

Comments

Popular News (Last 30 Days)

Serchhip DCSO sawn a ni