Hmasawnna reng reng ‘Sustainable development’ anga kalpui a pawimawh - Prof. Lalnilawma

Horticulture Minister Prof. Lalnilawma chuan hmasawnna reng reng ‘Sustainable Development’ anga kalpui a nih loh chuan awmzia a nei thui thei lo tih a sawi.

Mizo Academy of Sciences (formerly MIPGRASS) General Body Meeting vawi 25-na leh Seminar on Science & Technology for Sustainable Development nimin-a Pachhunga University College Seminar Hall-a neih a hmanpuina ah Horticulture Minister chuan ‘Sustainable development’ (hmasawnna ngelnghet) tih tawngkam hmanna a rei tawh ang huin a taka hmasawnna hmuh tur eng ang chiah nge awm tawh tih chu inenfiah a pawimawh thu sawiin, “Science hmasawnna chuan ram leh a mipuite tan hmasawnna a rawn keng tel tur a ni a, hmasawnna reng reng chu ‘Sustainable development’ anga kalpui a nih loh chuan awmzia a nei thui thei lo,” a ti. Science thiamna chu a tha leh a chhe zawnga hman theih ve ve a nih laiin Mizoram-ah chuan thiltha tihna atana hman a ni ber chu lawmawm a tih thu Minister chuan sawiin, Science lama mithiamten an thiamna leh thuziah te chu Mizo ram leh hnam, khawtlang leh mipuite nunphung tih hmasawn (quality of life) nan hmang se tih a duh thu a sawi bawk.

He hunah hian Dr. Aldrin Malsawmtluanga chuan Keynote Address sawiin, Sustainable Development Goals (SDG) hian a tum chu khuarel thilte tichhe si lova mihring hmasawnna hnathawh a ni tih sawiin, environmental, Social leh Economic lama hmasawnna tluantling thlen chu a tum a ni tih a sawi a. Mihringte hian damkhawchhuah nan mamawh pathum a neih - chaw, tui leh energy tih tarlangin tun dinhmunah NITI Aayog-in SDG India Index 2020-a Mizoram a tehdan chuan India ramah a titha pasarihna a nih thu a sawi bawk.

Mizo Academy of Sciences-ah hian Member 502 an awm mek a, General Body Meeting thurel zingah Directorate of Science & Technology chu Department puitlinga hlankai te, Mizoram Science Research Database siam chungchang leh Single Use Plastic hman khapna dan khauh zawk kenkawh dan tur chungchang te a tel a ni.