Hmar Veng-ah ASF chungchang inzirtirna hun buatsaih a ni

Serchhip khawpui chhunga African Swine Fever (ASF) hri lenna, Serchhip Hmar Veng ah nimin khan AH&Vety Department chuan ASF chung-chang inhrilhhriatna hun an buatsaih.

Serchhip Hmar Veng YMA Hall-a he hun hman hi Serchhip District-a AH&Vety Officer Dr. H. Vanlalrawna chuan kaihruaiin ASF hi Serchhip District-ah kum 2021 April 13 khan hriat tan a nih thu sawiin, hemi kum hian Vawk thi leh suat engemaw zat an awm thu a sawi a. A kumleh 2022-ah August 19 atangin ASF hi Serchhip District-ah hmuh leh niin Bawktlang khua ah hmuh tan a nih thu a sawi a, kum 2023-ah ASF avanga harsatna lutuk a thlen loh laiin kumin ah May 8 khan Khumtung khua ah ASF hri hi hmuh leh a nih thu sawiin, he hri leng a ziaawm theihna tur hian sawrkar in hma a lak mek thu leh heng a hmalakna te hi kan zawm that a pawimawh thu a sawi a. Hri leng avanga Vawk suat sak te tan hian zangnadawmna dil leh tum a nih avangin Vawk suat te chu uluk taka chhinchhiah zel tur a nih thu a sawi bawk.

He hunah hian Serchhip Hmar Veng VCP Albert Lalramsiama chuan Vawk hri leng mek ah sawrkar hotute nen inberawn chunga hma an lak reng thu sawiin, sawrkar ruahmanna te tha taka zawm a pawimawh thu leh hri avanga Vawk thi te pawh uluk taka phum thin tur a nih thu a sawi a. Hemi hnu hian Dr. David H. Beihroly, Manager BSS (FOCUS) chuan he huna kalkhawmte chu ASF natna chungchang leh a darh theih dan bakah hri laka ranvulh te a him theihna tura hriat tur pawimawh hrang hrangte a zirtir bawk a ni.

Nimin-a he hun hman ah hian mi 30 vel an tel a, kumin hian Serchhip Hmar Veng-ah hian Vawk 22 thi tawhin Vawk pahnih suat a ni tawh bawk a ni.