Apex Bank hi Mizo mipuite ta, a hlawkna pawh Mizo mipuite tel a ni - Chairman, MCAB

Mizoram Cooperative Apex Bank (MCAB) Ltd. hotute chuan Apex Bank chu Mizo mipuite ta, a hlawkna pawh Mizo mipuite tel a nih thu sawiin, an Bank kaltlanga sum chevel reng reng Mizoram pawnah chhuak lovin State chhungah vek a virkual avangin an hlutna chu mipuiten hre thar zel se an duh thu an sawi.

Mizoram Cooperative Apex Bank (MCAB) Ltd. hian nimin khan MJA Public Libary-a hman turin Computer Set an pe a, Computer inhlanna puala MCAB Head Office-a hun hman ah Apex Bank Chairman, Lalnunsanga chuan, Apex Bank chu Mizo mipuite ta, a hlawkna pawh Mizo mipuite tel a nih thu leh an Bank kaltlanga sum chevel reng reng chu Mizoram pawnah chhuak lovin State chhungah vek a virkual avangin an hlutna chu mipuiten hre thar zel se an duh thu a sawi a. Bank ringawt chu an hmalakna a ni lo tih sawiin, thingtlang-a cheng, Bank awm lohnaah mipuiten hma an sawn theih nan Primary Agriculture Credit Cooperative Society (PACS) an kalpui a, hei hi thingtlang khaw tam takin an chhawr tangkai mek a ni, a ti.

Apex Bank hian tun dinhmunah Mizoram hmun hrang hrangah Branch 28, ATM 34 leh Mobile ATM 2 an nei mek a, kumin chhungin Branch thar 8 hawn tumin an inruahman mek a, Board of Director term kal mek, kum 5 chhungin Branch 50 neih tlin tumin hma an la bawk a. Sawrkar kum liamta 2023-24 chhung khan Deposit cheng nuai 1,50,757.54 dawngin Loan cheng nuai 1,17,212.84 an pechhuak a. Kumin March ni 31 thlenga Deposit an dawn atanga Loan an pekchhuak, CD Ratio chu 77.75% a tling a, Mizoram a Bank awm zinga CD Ratio sang ber niin, Sorkar kum liamta chhung khan hlep cheng nuai 4,246.47 an nei a ni.

Apex Bank hotute chuan Branch pakhat hawng turin cheng nuai 25 vel an sen bakah thawktu 3/4 dah nghal a ngaih avangin dilna an dawn hrang hrangte pawh uluk taka an zirchian thin thu an sawi a. ATM-a Mizo tawng hmanna awmchhun an nih tih sawiin, tunhnai kum 10 chuang liam ta atng khan kawng hrang hrangah hma-sawnna an neih thu leh an hlawkna pawh kumtin a pung chho tih an sawi bawk.

Comments

Popular News (Last 30 Days)

Serchhip DCSO sawn a ni