India rama Finance Minister thutkhawm ah ‘Peace Dividend’ kan mamawh thu Chief Minister in a sawi

Chief Minister Lalduhoma chuan State dangte dinhmuna ding ve phak turin sum leh pai mamawhna a sang nia sawiin, ‘Peace Dividend- siamsak kan mamawh tih a sawi a. A kaihhruai sawrkar chu Mizoram-a ‘Change’ thlentir tum tlat an nih thu a sawi bawk.

Inrinni khan New Delhi-ah Union Finance Minister Nirmala Sitharaman-i hovin India rama State leh UT zawng zawnga Finance Minister te chuan Pre-Budget Meeting an nei a, he hunah hian Mizoram atangin Finance changtu Chief Minister Lalduhoma pawh telin Mizoram chuan hun rei tak rambuai kan tawrh avangin hmasawnna hnathawh kan hmu tlai bik tih a sawi a. “5th Five Year Plan atang khan mumalin kan kal ve chauh a ni. Chuvang chuan State dangte dinhmuna ding ve phak turin sum leh pai mamawhna a sang hle,” a ti a. Sum mamawh te mahnia thawkchhuak turin State dangte angin Industry tihtham kan neih bawk si loh avangin ngaihtuah kan ngai hle tih a sawi a. “Vawii-nah State ralmuang tak ni tawh mah ila kan thenawm State te leh ram te-a harsatna thleng avangin min rawn bel tura rawn lut kan ngah hle a, kan tan phurrit a tling. Tin, Security Related Expenditure (SRE) hi Central sawrkarin min pek ve loh laiin kan thenawm State leh ram atanga hel (insurgent group) pawlte laka invenhim ve reng kan ngai bawk a. Peace Dividend siamsak kan mamawh a ni,” a ti bawk.

Chief Minister chuan a kaihhruai sawrkar chu Mizorama 'change' thlentir tum tlat an ni tih sawiin, chumi atana an mamawh hmasa chu sum leh pai tam zawk a nih avangin 2024-25 Budget-ah sum tam zawk pe turin Central sawrkar a ngen a. “15th Finance Commission khan Mizoram tan Special Grant cheng vbc. 546 a ruahman a, mahse hei hi kan la dawng kim lo nasa hle a. Tin, 2019-20 leh 2020-21 budget a Share of Taxes atanga Mizoram dawn tur cheng vbc. 2370.80 zet kan la dawng lo bawk a. Heng kan sum dawn loh te avanga kan leiba (liability) te hi Vawiin thlengin kan la chhawm si a. A chinfelna min dap sak thei ula kan duh em em a ni,” a ti bawk.

Chief Minister hian 14th leh 15th Finance Commission ten rawtna an siam anga Professional Tax rate ennawn thuai tha a tih thu te, Centrally Sponsor Scheme sum te Single Nodal Agency a pekchhuahna dan chuan Central Treasury Rules a mil zan lo deuh nia a hriat thu te, Mizoram chu ram kilkhawr, nitin mamawh man to fal bikna a nih avanga Special Package pek a mamawh thu te, Exterally Aided Projects atana sum hmuh theih bithliah chu ennawn deuh thaa a hriat thu leh SASCI sum hman dan tur awlsam deuh zawk duan tha a tih thu te a sawi bawk.

Comments

Popular News (Last 30 Days)

Serchhip DCSO sawn a ni