Cyclone Remal vanga chhiatna thleng enfiah mek

Cyclone Remal avanga Mizoram-a chhiatna thleng enfiah tura rawn kal Inter-Ministerial Team te chuan hmun hrang hrang tlawh mekin he thlipui tleh in a tihchhiat thawmthat nan hian a tlem berah cheng vbc. 237.6 vel ngai tua chhut a ni.

Cyclone Remal avanga Mizoram hmun hrang hranga chhiatna thleng endik tura Sawrkar laipuiin a ruat, 'Inter-Ministerial Central Team' te hian Zirtawpni khan Mizoram tawn thlengin Sairang, Sairang Dinthar leh Sihhmui te an tlawh nghal a, Inrinni khan Aijal Club-ah DM&R Minister K. Sapdanga uapna hnuaiah Mizoram Sawrkar hnuaia concerned Department hrang hrang hotute nen thukhawmin Mizoram hmun hrang hranga Cyclone Remal avanga chhiatrupna thleng chungchang an sawiho bawk a ni. 

He inkawmna hunah hian Mizoram sawrkar aiawhin DM&R changtu Home Minister K.Sapdanga chuan Central Team te lawmna thu leh State in Cyclone Remal avanga chhiatna liantham kan tawh dan te, kan kawngpui, kan tuilakna, electric hruipui leh khawl chhia siamthat ngai te bakah kan thlawhhma tuilian in a tihchhiat dan te a sawi a. Mizoram in Cyclone Remal a tawrhna chu rinphak bakin a nasa a, Central Team ten a hmun ngeiah an rawn endik thei chu lawmawm a tih thu a sawi. Home Minister chuan Chief Minister Lalduhoma'n Union Home Minister Amit Shah hnenah he chhiatna thleng chungchang ah hain Memorandum a thehlut tih sawiin, “Tuna chhiatrupna lo thlengah hian nunna hlu tak 34 lai kan chan bakah thil tihchhiat a nei nasa em em a. Heng kan hmunhma leh kan hmanraw chhia te a siamthatna atan cheng tam tak sen a ngai dawn,” a ti a. SDRF leh NDRF rate angin mamawh te chhutchhuaha ngenna siam a ni tih a sawi a. Mizoramin Cyclone Remal tihchhiat thawmthat nan hian a tlem thei ang bera chhutin Proposal cheng vbc. 237.6 man a duang tih a sawi a ni.

He thutkhawm hi Chief Secretary Dr. Renu Shamra IAS chuan kaihruaiin inlawmna thu a sawi a, DM&R, PWD, PHED, P&ED, Agriculture leh Horticulture Department ten Power Point presentation an pek te thlirho niin Power Point Presentation-ah hian Mizoram hmun hrang hranga chhiatrupna a lo thlen dan te leh siamthat hna thawhna tura mamawh zat te chiang takin an tarlang a ni.

Inter-Ministerial Team hi Ministry of Home Affairs-a Joint Secretary Abhijit Sinha chuan rawn ho in thutkhawm an neih zawh hnu hian Melthum, Hlimen, Kulikawn leh ITI Veng-a chhiatrupna thlenna hmunhma te a hmunah an endik a. Nimin khan Greater Aizawl Water Supply Scheme Phase-I leh II bakah Falkawn-a ZMC tlawhin Aizawl - Aibawk - Darlung kawng ta an tlawh bawk a ni.

Comments

Popular News (Last 30 Days)

Serchhip DCSO sawn a ni