ASF vangin Vawk thi 30 awm belhin 149 suat a ni
AH & Vety Department in an chhinchhiahna atanga a lan danin Vawk hri, ASF leng mek hi Serchhip District-ah chuan a la hluar zel a, nimin khan khaw 5-ah Vawk thi awm lehin Thenzawl-ah 13, North Vanlaiphai-ah 9, Khumtung-ah 4 leh Baktawng leh Chhuan-thar Tlangnuam-ah Vawk 2 ve ve a thih belh leh a, heng te nen hian kumin hian Serchhip District a khaw 10-ah ASF vangin Vawk 350 a thi tawh a ni. Nimin vek khan Serchhip District-a khaw 6-ah ASF hri darh zel tur venna atan Vawk 149 suat leh a ni bawk a, heng te hi Chhingchhip-ah 94, Chhuanthar Tlangnuam-ah 38, Keitum-ah 6, Baktawng-ah 5, North Vanlaiphai-ah 4 leh Khum-tung-ah 2 te an ni a. Serchhip District-a ASF hri vanga Vawk thi tamna ber Chhuanthar Tlangnuam ah nimin thleng khan Vawk 98 thi tawhin Vawk suat tamna ber Chhingchhip-ah Vawk 1176 suat a ni tawh bawk a ni.
Hetihlai hian Serchhip District-a Baktawng khua leh Chhiahtlang khua ah te tunhnaiah Vawk a thih nual avang leh heng Vawk thi te hi ASF vanga thi an ni tih finfiah a nih avangin Serchhip DVO Dr. H. Vanlalrawna chuan nimin, June 21, 2024 atang khan heng khua te hi Vawk hri lenna hmun, Infected Area-ah a puang a, hri lenna hmun a lo puan tawh khaw dang te ang bawkinVawk lakluh leh talh chungchang ah khuahkhirhna pawh kenkawh tur a ni ang. Chhiahtlang khua ah hian ASF vanga Vawk thi 11 awm tawhin Vawk 5 suat a ni tawh a, Baktawng-ah hian ASF vanga Vawk thi 32 awm tawhin Vawk 47 suat a ni tawh bawk.
Heti hian Serchhip District-a ASF vanga Vawk thihna khaw 10 zingah nimin-a puan tak khaw pahnih Chhiahtlang leh Baktawng bakah Chhing-chhip, Khumtung, Keitum leh North Vanlaiphai te chu ASF hri lenna, Infected Area-ah hian puan a ni tawh a ni.
Comments
Post a Comment