Serchhip-ah Inter-District Senior Weightlifting Championship 2024 neih a ni
Mizoram State Sports Council (MSSC) leh Mizoram Weightlifting Association (MWLA) bultuma neih he Championship hi Sports & Youth Services Department-a Joint Director C. Lalremsanga chuan nimin khan Serchhip Boxing Hall-ah khuallian nia hawngin Weightlifting chu Mizote tan infiamna buaipui chi a ni tih chu he infiamna-a kan Medal lak tawhte atangin a lang tih sawiin, Coach tha te kaihhruaina hnuaia Training chu a that rualin, anni chuan tihdan phung te min hrilh hnuah kan hlawhtlinna chu kan beih hram hramna ah a in nghat tih a sawi a. Hei vang hian tih hram hramna chu hlawhtlinna a ni tih hre reng turin he huna tel infiammi te chu a chah a ni.
SDWLA President H. Lalchhuanawma kaihhruai he hunah hian MWLA President Lallianthuama pawhin kum 2036-ah India in Olympic thlen a tum thu leh chutah chuan Mizoram atang pawhin infiammi a tam thei ang ber an tel theihna turin sawrkar pawhin hma a lak mek thu a sawi a. Infiamna lama theihtawp chhuah a tul rualin lehkha zir a pawimawh thu pawh sawiin, he huna khuallian C. Lalremsanga pawh India ram aiawha Olympic-a a tel hnuah lehkha a zir san avangin sawrkar-ah pawh dinhmun sang tak a chelh thei tih a sawi a. Weightlifting-ah hian District hrang hrangah a ti thei te dapchhuak zelin chuta chher zui tlak nia hriat te chu Army Boys-ah an luh theihna tura hma an lak dawn thu leh bungrua an mamawh ang te pawh an hmuh theih dawn thu a sawi bawk a ni.
He hunah hian MWLA-a General Secretary Malsawma Khiangte chuan Report pein Mizoram Inter-District Senior Weightlifting Championship-2024 ah hian Mipa tan Category 9-ah inelna buatsaih niin kg. 55 atanga kg. 100 chunglam thlengin intihsiakna neih a ni a, mi 34 an tel a. Hmeichhe lamah Category 8-ah intihsiakna neih ni bawkin kg. 45 atanga kg. 87 thleng tan intihsiakna neih a ni a, infiammi 25 telin mipa leh hmeichhia ah hian District hrang hrang 8 atangin an vaiin mi 59 an tel a. Nimin khan intihsiakna hi neiin nizan khan chhunzawmin zawhfel hman tura ruahman a ni. a. August thla ah State Championship neih leh tur a ni ang.
Comments
Post a Comment