Inter-Ministerial Central Team ten Cyclone Remal avanga Mat Phai-a chhiatna thleng an enfiah

Cyclone Remal avanga Mizoram-a chhiatna thleng endik tura sawrkar laipui in Mizoram-a a tirh Inter-Ministerial Central Team te chuan nimin khan lehlanga Serchhip District tlawhin Serchhip Mat Phai-a chhiatna thleng hrang hrang te a hmunah kalin an enfiah.

Serchhip District-a Cyclone Remal avanga chhiatna thleng enfiah tura rawn kal Department of Agriculture-a Director Jintu Das; MoFDE a Deputy Director Mahesh Kumar leh Ministry of Jal Shakti-a Superintending Engineer Rajveer Singh te hian nimin zing khan Aizawl atanga Serchhip rawn thlengin Serchhip DC Office-ah District thuneitute leh Departmeng thrnkhat hotute an kawm nghal a. He hunah hi Serchhip District Bawrhsap David Lalthantluanga chuan kaihruaiin Cyclone Remal avanga harsatna thlen dan tlangpui sawiin, Central Team te pawhin an rawn kal chhan te an sawi a. Hemi hnu hian Serchhip DC Office-a SDC Lalhruailiana Zote chuan May ni 27 leh 28, 2024-a thlipui leh ruahpui avanga Serchhip District-a In leh lo chhiatna thlen dan tarlangin, Serchhip District chhungah leimin report 23 an dawn thu leh In chhia 60 vel awmin heng zinga 22 hi luah zui tlak tawh lo khawpa leimin leh tuihawkin a tihchhiat te an ni a, 38 te erawh chei thata luah leh tlak (partially damaged) an ni tih a sawi.


Hemi hnu hian Serchhip-a Horticulture Department atangin BHO, Hannah Lalrohlui Betlu chuan ruahsur nasa leh tuilian avanga Serchhip District-a chhiatna thlen dan tarlang ve lehin Serchhip Mat Phai chuan nasa taka an tawrh thu a tarlang a, Mat Phai hi chhungkaw tam tak eizawnna hmun a nih thu sawiin, report an dawn chinah Horticulture thlai hmanga eizawng loneitu 152 te a nghawng a, chhiatna thlenna hmun hi Hectare 130 vela zau niin thlai a tihchhiat hlutna hi belhkhawmin cheng nuai 41.92 zet a nih a sawi a. Mat Phai chu Mizoram chawhmeha chawmtu ‘Vegetable bowl of Mizoram’ ti hiala vuah a nih thu sawiin, Zikhlum, Bawkbawn, Hmarcha, Tomato, Vaimim leh thlai dang te chin a nih thu a sawi bawk a. Mission for Integrated Development of Horticulture (MIDH) hnuaia siam Sihdarh Zau Green House, East Lungdar a chhe hneh hle a; Serchhip District chhung hmun hrang hranga Green House Cluster dang 7 te pawh a khawih chhe nual niin Horticulture hotute chuan an sawi a ni.

Serchhip-a District Agriculture Officer (DAO) Lalchharliana chuan Serchhip District chhunga Agriculture Crop chinna hmun Hectare 40 vel bawra zau chu Cyclone Remal hian a tihchhiat thu sawiin, loneitu mi 54 te Lo a tihchhiat thu leh a hmunhma pawh chipchiar taka an fan tawh thu a sawi a. Thli leh ruahpui bakah tuihawk luang nasa avangin leilet te chu leivungin a chhilh nasa hle a. Tuilakna Irrigation pipeline te a tichhia a. Kum tam tak intuak hnua an lei khawl ‘Farm Machinery’ te a tihchhiat nasa thu a sawi bawk.

He hunah hian PHE Department leh PWD a hotute pawhin ruahsur nasa leh thli tleh avanga harsatna an tawh te an tarlang bawk a ni.

Serchhip DC Office-a inkawmna an neih hnu hian Serchhip Mat Phai pan nghalin Zawlpui Zau FMC hruaitu ten an lo dawngsawng a, Lumtui lui an lakna tuikhuah leh tuikawng te leivung in a hnawh thin dan te a hmunah enpuiin Tuilut lui-a leivung rawn tawlh in Leilet tam tak a tihchhiat te pawh an en nghal a. Hemi hnu hian Serchhip Mat Phai-a Tuisen zau tlawh lehin Mat lui lian in thlai chinna hmun a tihchhiat te an en leh nghal a, Horticulture Department hotute kaihhruaina hnuaiah loneitu ten harsatna an tawh dan hrang hrang te an sawifiah bawk a ni.

Inter-Ministerial Central Team ten Serchhip Mat Phai an tlawhna ah hian Serchhip District Bawrhsap David Lalthantluanga bakah Department hotute an tel bawk a, tanpuina awm thei te in hrilhfiah niin Central Team te hian an thil hmuh atanga Report siamthat ngai te an sawi a, nimin tlai khan Aizawl an pan leh a ni.

Comments

Popular News (Last 30 Days)

Serchhip DCSO sawn a ni