Damchhung a Jail tang tur mi 56 awm mek

Mizoram-ah damchhunga Jail tang tur (lifer) mi 56 an awm mek a, June 20, 2024 thleng khan Mizoram-a Jail hrang hrang 10-ah mi tang (prisoner) 1,889 an awm a, awm thei zat (jail capacity) aia mi tang tamna 503 a tling.

Prison Department tarlan danin Mizoram-ah Jail 10 awmin chung chu mi 1,386 awm theihna a nih laiin, tang awm mek zat chu 1,889 an tling a. Aizawl-a Central Jail chu mi tang awm tamna ber a ni. Central Jail hi mi tang 438 awm theihna a nih laiin June 20, 2024 thlenga tang awm zat chu mi 898 an tling a, tang awm thei zat an pelhna chu 460 a ni. 

Mi tang 191 awm theihna, Central Women Jail, Aizawl-ah tang 96 an awm mek a, District Jail, Aizawl-ah tang 116 awmin, tang 90 awm theihna a ni a. Mi tang 109 awm theihna District Jail, Lunglei-ah tang 166 an awm mek bawk. District Jail, Siaha-ah tang 92 awmin he Jail hi tang 78 awm theihna tura ruahman a ni a. Tang 105 awm theihna District Jail, Champhai-ah tang 174 awm mek bawkin District Jail, Kolasib-ah tang 134 awm theihna niin mi 117 an awm mek bawk. 

District Jail, Lawngtlai chu tang 98 awm theihna tura ruahman niin mi tang 26 an awm mek a, District Jail, Serchhip-ah mi tang 128 awm theihnaah tang mi 50 an awm a, mi tang 96 awm theihna District Jail, Mamit-ah mi 73 a awm mek bawk.