Lawngtlai-a In kang-ah mi pahnih an kanghlum

Nizan hmasa khan Lawngtlai Vengpui-a kangmei chhuakah In pakhat kangin mi pahnih in nunna an chan.

Nizan hmasa dar 7:00 vel khan Lawngtlai Vengpui-a Thangnawna (L) In, Assam type chu bungrua engmah chuh hman lohin a kang a, In chhunga awm In neitu Thangnawna (L) nupui Sungtiali (76) Thangnawna (L) farnu Darhliangi (70) te chu In kang ah hian an kanghlum a ni. Kangmei a chhuahlai hian Inah hian mi pathum awmin mipa pakhat chu tukverh lamah zuangchhuakin a him a, thudawn danin Lawngtlai-ah hian Inrinni zan atangin Power supply a awm loh vangin kangmei hi Mombati chhit atanga chhuak nia rin a ni.

In kanna hmun hi nizan hmasa khan Lawngtlai East bialtu MLA, Dr. Lorrain Lalpekliana Chinzah; Lai Autonomous District Council (LADC)-a CEM mawhphurhna la mektu Lalropuia Chinzah leh Lawngtlai DC Office atangin Official ten an tlawh nghal a, Lawngtlai East Bialtu MLA leh Adviser to Chief Minister Dr. Lorrain Lalpekliana Chinzah chuan chhiattawkte chhawmdawlna sawrkar atanga awm thei ang angte buaipui nghal a nih tur thu sawiin, chenna In dang sa turin theihtawp a chhuah tur thu a sawi bawk.

Chief Minister Lalduhoma chuan he chhiatna thleng hi pawi a tih thu Social Media kaltlanga tarlangin, chhiat tawkte a tawrhpui thu leh an kalsan tak an chhungte chu Pathian in thlamuan se a duh thu sawiin, he vanduaina thlenga nunna chan mi pahnih te chu Chief Minister Relief Fund atangin Rs. 25,000/- ve ve a ral an nih tur thu a sawi bawk.