Mizoram-ah AIDS vangin mi 5,021 thi tawh

Mizoram State AIDS Control Society (MSACS) chhinchhiah danin October 1990 atanga March 2024 thleng khan Mizoram-ah AIDS vanga thi mi 5,021 an awm tawh.

Mizoram-ah hian kum 1990 khan HIV hri kai hmuhchhuah tan niin MSACS chhinchhiahna atanga a lan danin hemi atanga kumin March thla tawp thleng khan Mizoram-ah HIV hrik pai hmuhchhuah tawh zawng zawng chu mi 30,523 an ni a, AIDS vanga thi mi 5,021 awm tawhin AIDS vanga thi zingah hian mipa 3,303 leh hmeichhia 1,634 bakah naupang 84 an awm a ni. AIDS natna hnathawh tih muangchan theihna Anti-Retroviral Therapy (ART) damdawi la mi 22,318 an awm mek bawk. 

MSACS-in a tarlan danin, kum 1990 atang khan Mizoram-ah HIV/AIDS hrik pai hi hmuhchhuah tan a ni a, HIV positive hi nausen atanga kum 14 inkar 778 awm tawhin, kum 15 atanga 24 inkar ah 6,077 an awm tawh a, kum 25 leh 34 inkar tam berin mi 11,707 an awm tawh bawk a ni. Kum 35 leh 49 inkar 7,786 an awm tawh bawk a, kum 50 chunglam HIV hrik kai mi 1,680 an awm bawk a ni. Heti hian HIV positive hmuhchhuah tawh zat hi 29,028 an awm a, nu naupai HIV positive hmuhchhuah 2,495 te nen HIV positive hmuhchhuah tawh zawng zawng chu 30,523 an tling tawh a ni.