Mizoram-a thlai thar lei leh hralh chungchanga sawrkar hmalakna ruahmanna puanzar a ni

Mizoram State Agriculture and Allied Marketing Board-a Chairman leh Agriculture Minister PC. Vanlalruata chuan thlai thar lei leh hralh chungchanga an hmalak tawh chin leh hmalak an tum dan te nimin khan a puang.

Nimin-a a Pisa-a thuthar thehdarhtute a kawmna ah Agriculture Minister PC. Vanlalruata chuan sawrkar thar chuan thlai pali-Sawhthing, Aieng, Hmarcha leh Hmunphiah te kuthnathawktu ten man man zawka an hralh theih nan Support Price a siam thu leh chu Support Price aia to a an hralh theihna turin a hralhna (market) a theih ang angin hma a lak pui dawn tih a sawi a. Thlai thar lei chungchanga sawrkar tum ber pakhat chu a thartute leh a leitute awmze nei zawka an in dawr tawn theih nana a Market Linkage siam sak a ni tih sawiin, Kum thum chhung hian mumal taka Market Linkage siam hman an tum thu leh kum thum hnuah chuan sawrkar a inrawlh vak ngai tawh lo tura sumdawngte leh thlai thartute an indawr theih tawh an beisei thu a sawi bawk.

Minister chuan Kum thar-ah hian heng thlai pali zingah Sawhthing hi quintal nuai sawm (10 lakh quintals) chuang thar tura beisei a nih avangin a hralh dan tur ruahmanna chi thum an siam tih sawiin, an hmalakna hmasa ber chu Tender/Auction system anih thu leh tun dinhmunah khaw 20-in Tender an kalpui mek tih a sawi a. Kum thar (2025)-ah Sawhthing thar zat tur hi a tam tham dawn avangin a hring hian kan hralh seng dawn-a a lan loh avangin a sawngbawlna (Processing plant) din turin chak taka hmalak mek a nih thu leh kan Sawhthing tharchhuah hi a tam tham dawn avangin a lei tur lian te dapin mi rintlak agreement ziahpui nise tiin ruahmanna an siam thu a sawi bawk.

Minister chuan Kuthnathawktute chu khaw tinah Multipurpose Primary Agriculture Credit Society (MPACS) lo in din tur leh sawrkar Official-te tha taka lo tawiawm turin an in hriattit thu pawh sawiin, Kum 2024-a thlai thar zat, thlai chin zat leh nakum (2025)-a thar beisei zat lo hriat lawk tur a ni tih a sawi a. Sawrkarin Sawhthing rate Rs. 50/- a sawi chu Grade-A a nih thu leh Grade-B rate chu a leitu sumdawng-te leh Society te kutah dah a ni tih pawh sawiin, ‘Sawrkarin a buaipui dawn’ tih vang ringawta mahni pawhin kan lei duh loh tur a man to a sawrkar lei tir talh tum loh tur a nih thu leh Sawrkar-in Support price a sawi aia to a farmer ten an hralh theih chuan sawrkar a inrawlh lo ang tih a sawi bawk.

Thlai thar rate in ang tlang (regulated market) kalpui an duh avanga Society kaltlang khera thlai thar lei tum a nih thu pawh Minister chuan sawiin, “State pawn atang te pawhin Mizoram sawrkar lei turin an rawn phur lut mai thei, Society member ta lo leh sawrkarin a hriatpui loh te ta chu buaipui kan tum lo,” tiin Society chu sawrkar kut ke ber tur an nih avangin an mawhphurhna a san thu leh politics ang zawng kalpui loh hram hram tur a nih thu a sawi bawk.

Comments

Popular News (Last 30 Days)

Serchhip DCSO sawn a ni