Serchhip-ah TKP te hriselna atan a huho in an tlan

Baptist Church of Mizoram (BCM) hnuaia Mizoram Thalai Kristian Pawl (MTKP) Rorel angin nimin khan Mizoram hmun hrang hrangah ‘Hriselna atan tlan’ tih hun hman a ni.
MTKP Rorel vawi 71-na chuan ‘Hriselna chungchang ah thalai ten hma kan sawn theih nan hmalak ni rawh se’ tia relin hemi bawhzuina atan hian nimin zing khan BCM hnuaia TKP te chuan hmun hrang hrangah ‘Hriselna atana Tlan’ tiin hun an hmang a. Serchhip Bial TKP te chuan nimin zing khan BCM Serchhip Biak In kawt atanga tanin Serchhip Bazar thleng a huho-a tlanna hun an hmang a, Serchhip Bazar-ah hian TKP Serchhip Bial President Rbt. K. Zodinpuia kaihhruaina a hun tawi hmangin Secretary Lalruatkiama Sailo kaihhruaina hnuaiah thutiam an la bawk a, Upa R. Vanlallawma, Senior Adviser in tawngtaina hun a hmang bawk a ni.

New Serchhip Bial-a TKP Unit pathum New Serchhip Unit, Ebenezer (P&E Veng) Unit leh Maranatha Unit (IOC Veng) te chuan mahni Biak In atanga tlan tanin IOC Veng Kawn-ah an intawkkhawm a, Bial TKP President Rbt. C. Lalnunpuia’n tawngtaina hun hmangin Bial TKP Secretary R. Lalremruata kaihhruaina in thutiam an la a, he hun hi bialtu Pastor, Rev. K. Lalhneh-liana chuan a telpui bawk a ni.