LADC-a MDC mi 9 te ZPM-ah lawmluh an ni

Lai Autonomous District Council (LADC)-a MDC pakua-te chu nimin khan ZPM party-ah lawmluh an ni.

Heng MDC te lawmluhna Inkhawm LADC Hall, Lawngtlai-a neih ah ZPM Vice President W. Chhuanawma chuan heng MDC te hi ZPM-ah lawmlutin, “State-ah ZPM a sawrkâr hlim leh LADC sawrkârah sawrkârna siam thei an awm loh lai khan ZPM-in kan duh chuan sawrkârna kan siam thei a, mahse State sawrkar hmasate'n an thuneihna hmang suala District Council sawrkâr an pawngsual thin chu tihtawp kan duh a, kan thuneihna kan hmang sual ve duh lo a ni,” a ti a. “ZPM chuan Autonomous District Council sawrkâr inrêlbawlna hi zahawm kan ti a, MDC by-election leh VC Election-ah ZPM party lo thlang tling ula ngelnghet leh zahawm takin LADC rorêlna kan siam anga, kan tibeidawng lo ang che u,” tiin Pathianin rem a tih chuan ZPM hlang sawrkarna pawh LADC-ah an siam thei tih a sawi.

ZPM-a lawmluh tak MDC mi 7 te hi MNF atanga thlantlin te niin Mânghmûnga Chinzah, B.N. Thangpuia, CL. Lianzuala, V. Zathanga, T. Lalêngmuana, Tuturu Singh leh L.Lalhmachhuâna-te an ni a, anni bakah hian Independent MDC N. Zangûra leh L.R Dingliana Chînzah te pawh ZPM-ah hian lawmluh an ni bawk a. Nimin-a lawmluhna hunah hian Lawngtlai East bialtu MLA Dr. Lorraine Lalpêkliana Chinza leh ZPM Lai District Hqrs. a President M.C Lalramchhana leh Adviser K.Hre Kung, MDC bakah lawmluh te atangin Manghmunga Chinzah, MDC (Ex-CEM) leh N. Zangura, MDC te pawhin thu an sawi a ni.