Serchhip District-ah ASF vanga Vawk thi a pung; Magistrate in khapna thupek a tihchhuak thar

Serchhip District chhunga khaw 10-ah kumin hian African Swine Fever (ASF) vanga Vawk thi chhinchhiah a ni tawh a, Serchhip District-a Vawk lakluh leh a sa zawrh chungchang ah khapna thupek tihchhuah thar leh a ni bawk.
Mizoram-a Vawk hri leng mek, ASF chuan Serchhip District-ah darh lam ala pan zel niin a lang a, Serchhip District-a Chhuanthar Tlangnuam a Vawk Sample lak chu PCR hmanga enfiah a nih hnuah ASF hri an kai tih finfiah a ni a, Thenzawl leh Lungpho atanga sample lak te chu RAgT hmanga enfiah a nih hnuah ASF hri an kai ngei nia hriat niin PCR hmanga enfiah leh tura tih a ni bawk a, heng khuaa Vawk thi te nen hian kumin-ah ASF vanga Serchhip District-a Vawk thi hi nimin thleng khan 320 tling tawh a, Vawk 1482 zet suat a ni tawh bawk.

Serchhip District-a Chhuanthar Tlangnuam-ah hian nimin khan ASF vanga Vawk thi 6 awm lehin a hmaa Vawk thi lo chhinchhiah te nen ASF vanga Vawk thi 96 a tling tawh a, Vawk suat belh 7 awmin a hmaa lo suat tawh te nen Chhuanthar Tlangnuam-ah hian Vawk 45 zet suat a ni tawh a. Thenzawl-ah Vawk thi 2 chhinchhiah awmin Lungpho-ah 5 a awm bawk a. North Vanlaiphai-ah Vawk 6 leh Baktawng-ah 3 a thi bawk.

Hetihlai hian Serchhip District Magistrate chuan Serchhip District-a Vawk lakluh leh zawrh chungchangah thupek thar a tichhuak leh a. Hemi chungchanga June 19, 2024-a thupek a tihchhuah ah Serchhip District Magistrate David Lalthantluanga IAS chuan Infected Area a puan Chhingchhip, Khumtung, North Vanlaiphai leh Keitum khua te atanga Vawk leh Vawksa lakchhuah khap tlat a nih thu leh Vawk talh leh a sa zawrh pawh khap tlat a nih thu a tarlang a. Serchhip District chhungah ramdang (Foreign countries) atangin Vawk, Vawksa leh Vawksa atanga siam eitur reng reng lakluh khap tlat a nih thu te; Serchhip District chhung khua leh khuaa Vawk inlakpawh khap tlat a nih thu leh ASF hri len lohna ah pawh Vawk hrisel tha chauh talh tur a nih thu bakah Vawk damlo reng reng talh tura sawngbawl loh tur a nih thu a tarlang a. Vawk damlo leh thi reng reng chu AH & Vety Department thawktute hnenah hriattir vat tur a nih thu leh Vawk thi reng reng uluk takin disinfectant nen phum bo tur a ni tih a tarlang bawk.

He thupek hi thu leh awm hma chu chhuah a nih atanga thla hnih (2) chhung huam tur niin thupek zawm lo chu Section 188 IPC dan hmangin hrem theih an ni ang tih tarlan a ni bawk.

Comments

Popular News (Last 30 Days)

Serchhip DCSO sawn a ni