Lenkawl

 

Serchhip mipui ten punkhawmna atana Hall kan neih len ber, Serchhip Auditorium chu mipuite tana a him lo thei nia hriat a nih avangin thiat tura hmalak nise tih a ni.

Kum 2025-2026 Academic Session atana School luh tan ni, nimin khan Mizoram hmun hrang hranga zirna In te hawn leh tan a ni a, Serchhip District-a zirna In te pawh an hawng kim nia thudawn a ni.

Cheng nuai 224 senga sak Serchhip P&E Veng-a Block Development Officer (BDO) Office chu nimin khan Rural Development Minister Prof. Lalnilawma chuan a hawng a, Office building thar leh mawi ah duhtawk mai lova Zonun Zemawi-Hawihhawmna nen tha taka hna thawk turin he Office-a thawktute chu a sawm a ni.

PHE Department chuan Serchhip mipuite tana tuilakna ah harsatna lian lutuk an tawk rih lo tih sawiin, Tuikum lui-ah tui pawh a tam tawk rih thu an sawi.

Mizoram Rajya Sabha MP K. Vanlalvena chu Parliament thutkhawm-a a tel zawh hnuah nimin khan Mizoram-ah rawn hawin MNF General Headquarters-a Secretary-te'n Lengpui Airport-ah an lo hmuak a. Zohnahthlak zawng zawngte thlavang hauh ngamtu MP K. Vanlal-vena chu an chhuan thu thuziak chi hrang hrang an lo keng a, Mizo Nationalism zahpui lotu leh Isua zahpui lo tu a nih thu te an thuziak ah hian an tarlang bawk a ni.

Nimin khan Saitual DC Conference Hall-ah Saitual District Disaster Management Authority (DDMA) Chairman leh District Bawrhsap Dr. Lalngura Tlau kaihhruainain kumin Fur lo thleng tura chhiatna hrang hrang thleng thei laka Saitual District himna atana inpuahchahna turte sawiho a ni a, PWD, PHE, P&E leh Health Department hotute atangin Fur ruahsur hmachhawn tura an ruahmanna te leh inpuahchahna te ngaihthlak a ni a, Saitual District chu Zone 3-a then niin, Zonal Officer pathum ten an vil bakah Village Disaster Management Committee din a ni bawk.

Mizoram KVI Board in thla hnih (2) chhung awh Cane & Bamboo training Mamit-a an buatsaih chu nimin khan Mamit-a I&PR Conference Hall-ah a kharna hun hman a ni a, he hun hi Ministry of Textile-a Sr. Asst. Director Santosh Kumar chuan a hmanpui a ni. He Training-ah hian mi 30 telin M au leh hrui hnang hmanga thil siam dan chi hrang hrang an zir a, Trainees-te hnenah hian Certificate pek vek niin Certificate hi All India Level Certificate a ni a, India ram khawi hmunah pawh hna zawn nan emaw, Master Trainers neihna turin emaw hman theih a ni.

Mizoram chhimlam khaw hrang hrang tlawh turin PWD Minister Vanlalhlana chuan nimin khan Aizawl a chhuahsan a, PWD Minister hi Serchhip-ah rawn chawlin PWD hotu ten an lo dawngsawng a, hemi hnu hian Hnahthial pan leh nghalin tukthuan a ei bakah Bawrhsap K. Vanlalruati leh PWD hotu ten an lo dawngsawng leh a ni. Hemi hnu hian PWD Minister hian Sangau panin khawtlang hruaitute nen an inkawm bawk a, nizan khan Siaha-ah a riak nghal a ni. PWD Minister hian Vawiin hian Lawngtlai panin Tlabung leh Chawngte bakah Lunglei an tlawh chhunzawm leh dawn a. Deputy Speaker Lalfamkima bakah PWD Engineer in Chief, Er. H Zoramliana leh a thawhpui ten an tawiawm bawk a ni.

BJP Mizoram chuan nimin khan Aizawl-a an Party Office, Mipui Rûn-ah BJP Foundation Day vawi 46-na pualin hun an hmang a, he hunah hian an President Vanlalhmuaka chuan India ram hmangaih vanga mahni nunna hial pawh chan huama BJP dinna tur atana hma lo latute chhuanawm a tih thu sawiin, “BJP dintu kan mi hmasa te khan mahni indah hmasa lovin, 'Nation First, Party Second, Self Last' tih hi kan hriat reng a ngai,” tiin Party mipuite chu a fuih bawk a ni.

Mizoram Rajya Sabha MP K. Vanlalvena chuan nimin khan Sairang Railway Station chu tlawhin thawktu ten an lo dawngsawng a, Bairabi atanga Sairang inkâr Rel kawng km 51 vela thui siamna atan hian cheng vbc. 8,215 ruahman a nih thu sawiin, tûn thlenga hman zawh tawh chu cheng vbc. 7,714 a nih tawh thu a sawi a. Tunah hian Hortoki thleng Rel a kal thei tawh thu leh Hortoki atanga Kawnpui thleng pawh siam zawh tawh niin commission theih tawh a ni tih sawiin, NFR hotute chuan kumin July thla ah zawhfel an beisei thu an sawi a ni. 

Tun thla ni 3 khan Directorate of Forensic Science Laboratory, Mizoram leh National Forensic Sciences University, Gujarat-te chuan thawhhona tur thuthlung, Memorandum of Understanding (MoU) an ziak.

Ministry of Petroleum and Natural Gas bultuma Northeast Gas Grid Project hnuaia Panisagar (Tripura) atanga Sihmui inkara Gas Pipeline phum hna thawh mek chu nimin khan Supply Minister B. Lalchhanzova chuan a hmunah tlawhin a enfiah.

Aizawl atanga Lengpui Airport panna kawng Sihhmui kai-a Tlawng Lei dawh that hna thawh mek ah nimin khan Lei ruangam dawh kai a ni. Tlawng Lei dawh thar-ah hian Lei ruangam chu hmundang ah siamin hei hi hlankai tura ruahman a nih angin nimin khan a tahtawlin nawr kai a ni a, chawhnu dar 1:00 rik hma deuhin Lei hi an dawh kai a ni. Aizawl atanga Lengpui Airport panna kawng Sihhmui kai-a Tlawng Lei dawh hna hi nikum lam atangin ngawrh taka thawh a lo ni tawh a, nikum December thla khan Load Test a nih laiin a Lei khai kangtu hrui pakhat a chah avangin Lei dawhkai hna chu hun engemaw chen a khaihlak a, a helna kawngah LMV chin hnuailam tan kal theiha siam niin Motor lian chu Buichali lama kal tura tih an lo ni tawh a ni.

Statistical System tihhmasawn chungchang sawiho a State leh UT Minister-te intawhkhawmna ‘Conference on State Government Ministers on Strengthening of Statistical Systems’ chu Inrinni khan neih niin Mizoram atangin I&PR Minister Dr. Vanlalthlana chu a tel a ni.

Sssociation for Voluntary Blood Donation (AVBD) chuan Financial Year 2024-25 chhungin Mizoram-ah a thlawna thisen pek zaa 93.71 a nih thu sawiin, Mizoram in target a siam zaa 92 chu khum a nih thu an sawi a, Serchhip District Hospital Blooid Bank-a thisen pek za zela 97.67 chu Voluntary Donation a ni.

Mizoram sawrkar in ruahmanna a siam angin kum 2025-2026 Academic Session atan Vawiin hian zirna In hrang hrangte chu hawn tan a ni leh dawn ta.

Serchhip District Volleyball Association (SDVA) buatsaih ‘District Volleyball Championship’ leh ‘Age Group Volleyball Tournament-2025’ chu Inrinni zan khan khelh zawh a ni.

Sports Authority of India (SAI), Mizoram Police leh Thenzawl Cycling Association tangho buatsaihin 'Fit India Cycling Drive' chu Inrinni khan Thenzawl-a SAI Hockey Ground-ah neih a ni.

Serchhip Vengchung Pastor Bial KTP ten kumin a Bial Conference-a an thurel bawhzuina atan Serchhip Blood Bank-a thisen an pek mek ah Inrinni khan Serchhip Chhim Veng Branch KTP te chuan thisen Unit 11 an pe leh a, thisen petute hi mipa 5 leh hmeichhia 6 an ni. Hemi hmalam hian Dinthar Branch KTP ten thisen hi Unit 14 an lo pe tawh bawk a ni.

ZPM Party-a Hmeichhe Pawl, Zonu Serchhip Block chuan Zirtawpni khan hruaitu thlanna neiin President-ah Zarzoliani (New Serchhip Bazar); Vice President-ah Lalneihzami (Bazar Veng) leh Treasurer-ah R.Vanlalruati (Darnam) te thlan an ni.

Home Minister K. Sapdanga chuan sawrkar laipui duhdan angin Lengpui tumhmunah ramdang atanga lo zinte endik hna thawh tan a nih thu a sawi a. Protected Area Permit (PAP) leh Restricted Area Permit (RAP) te chu Online hmanga dil theih turin sawrkar laipui chuan a siam tawh a ni.

Mizoram leh Assam ramri buai chinfel tuma State pahnih Official te inbiak hun atana Assam sawrkar in April 25, 2025 a rawt chu Mizoram sawrkar chuan a thuphungin a pawm tih Home Minister K. Sapdanga chuan a sawi a, he inbiakna a Mizoram aiawh tur erawh tihfel la ni lovin in-buatsaihna kalpui mek a ni.

Mizoram-a African Swine Fever (ASF) hri leng thar leh mek chuan zuallam a pan zel niin a lang a, Inrinni thleng khan District 4-ah ASF hri hi hmuh a ni leh tawh a ni. AH&Vety Department in an chhinchhiah danin kumin hian ASF vanga Vawk thi 1,163 awm tawhin Vawk 372 suat a ni tawh a, District 4- Mamit, Siaha, Lawngtlai leh Lunglei District-a khaw 39-ah ASF hri hi hmuh a ni tawh bawk a ni. Nimin khan Mizoram-ah ASF vanga Vawk thi 46 lai awmin Vawk 12 suat a ni bawk a, Siaha District-ah Vawk 40 zet a thi leh a ni.

Mizoram-a sawrkar dinglai hnuaiah Zirtirtu 1,507 lak thar a ni tawh a, an zinga mi 526 chuan an hna an zawm lo niin School Education Department hotute'n an sawi.

Kolasib District chhung Buhchangphai bul Zukbual leilet zau-a leilet pakhat enkawltu Khalil Uddin Barbhuiya (40) chuan Zirtawpni khan a nupui Hassan Begum Barbhuiya (35) chu chempui in a hrawk ah a zai a, Hassan Begum Barbhuiya hi a hmun ah a thi nghal a. Tualthattu a puh Khalil Uddin Barbhuiya hi tlanbo in, man tuma zawn mek a ni.

New Delhi-a cham mek Education Minister Dr. Vanlalthlana chuan DoNER Minister Jyotiraditya Scindia leh DoNER Secretary Chanchal Kumar te chu a an pisa-ah tlawhin, Mizoram hmasawn nana pawimawh hrang hrangte a sawipui.

Indian Air Force (IAF) kuta Lengpui Airport hlan tura hmalakna a chawl rih nia thudawn a ni a, Working Committee pawhin Draft Memorandum of Agreement (MoA) an la ennawn leh lo nia thudawn a ni.

Operation Brahma hnuaia India in Myanmar-a lirnghing tuarte a tanpuina tur Lengpui thlawhna tumhmuna a rawn phurh thlen chu kar kalta Nilaini khan truck hmangin Zokhawthar-ah phurh thlen a ni.

Sawrkar laipui-a Power changtu Secretary Pankaj Agarwal chuan Mizoram Power & Electricity Department chu Corporatise thuai turin a ngen.

Nikum, 2024-2025 chhung khan Mizoram-ah In kang 37 awmin kangmei vangin mi pali an thi a. Zalen-in Fire & Emergency Services thawktute hnen atanga thu a dawn danin nikum chhung khan In kang hi thla tin a thleng a, March leh April-ah tam zual deuhin In kang report an dawn zawng zawng chu 37 a ni. Nikum chhung vek khan Mi-zoram-ah ram kang tum 147 thlengin March thla ah a tam fal hle bawk a. Nikum chhung veka kangmei in thil a tihchhiat hlut zawng hi Rs. 5,69,23,558/- nia chhut a ni a, bungrua hum zat hlut zawng hi Rs. 30,18,89,992 nia chhut a ni bawk.

Lunglei District-a Tlabung khua in Faina leh thianghlimna lama SDO (Civil) Moses Lalfakawma Tlau hova beihpui an thlakna kal zelah SDO (Civil) hian Tlabung VC leh Zodin VC te hnenah Sanitary Pad Vending Machine a hlan a, Sanitary Pad Vending Machine hi hmeichhiaten awlsam leh rang zawka puan them fâi (sanitary pad) hman mai tur an lakchhuah theihna tur niin, vantlang inthiarna hmunah heng khawl hi a enkawltu tur Village Council-ten an bun dawn a ni. Sanitary Pad Vending Machine-ah hian a mamawh apiangten cheng nga (Rs. 5) thir thlakin puanthem fâi pakhat zel an la chhuak thei dawn a ni.

Horticulture Department-a Director CH. Lalmuanpuia chuan Lunglei District chhung Mausen khuaa Banana Fibre Extraction Project dinna tur hmun chu Inrinni khan a tlawh a, Banana Fibre Extraction Project hi Horticulture Department-in Chief Minister's Innovation Challenge-a lawmman pakhatna an dawnna niin Department Director CH. Lalmuanpuia chuan Mausen khaw-tlangin he project, Balhla kung atanga la duang siamchhuahna leh chuta tanga thil siamchhuahna (Production Unit) dinna tur hmun pahnih chu enkualin, Unit One leh Unit Two anga hmalak a nih theih ngei a beisei thu a sawi a ni. He hunah hian Horticulture Director hi Horticulture Department-a thawktute leh Mausen khawtlang hruaitute, Mausen khaw chhunga NGOs pawl hrang hrang hruaitute leh Balhla chingtu Association ten an tawiawm a ni.

PLRS LEH ZU - Rev. Dr. Zaichhâwna Hlâwndo

Mizoram Sawrkar Flagship Programme Bana Kaih (Hand holding) Scheme hnuaiah Serchhip District chuan 1st Phase-a Sawhthing a leina man te chu Sawhthing neitute hnenah an pe fel tawh a. Serchhip District-a SCC 7 zingah Sawhthing la hralh zo lo hi SCC pahnih chauh an awm tawh a ni.

Serchhip Bialtu MLA leh Chief Minister Lalduhoma chuan a theihtawp chhuahin a Bial tan hna a thawk zel dawn tih a sawi.

Serchhip District chhunga Zote South khuaa Sawhthing hralh theih loh nia sawi chungchang chu nimin khan Serchhip Bawrhsap in thuthar thehdarhtute hnenah a sawifiah.

Serchhip Darnam Veng khawtlang chuan an huamchhunga Village Defence Party (VDP) din an dil angin tunhnai khan Serchhip District Superintendent of Police (SP) chuan VDP din phalna hi a pe a, niminpiah khan Serchhip Darnam Veng VDP te tan hian Serchhip Addl. SP Pisa-ah  Sensitization Training cum Interection neih nghal a ni bawk.

Nizan hmasa khan Mizoram Police, Assam Rifles leh Bualpui (NG)-a YLA Branch te chuan Joint Operation neiin Serzawl Road-ah Methamphetamine mum 42,000 zet an man a, heng an thil man te hi kg. 4.600 a rit niin tualchhunga hralhna rate-ah Rs. 59,80,000/- man vel nia chhut a ni a, Myanmar atanga Mizoram-a pek tur nia hriat a ni.

Lunglei khawpui chawmna atana tuilakna ah mipui mamawh ang Tui pump tur a awm loh avanga harsatna thleng chuan zuallam a pan zel a, PHE Department hotute chuan ramngaw chereu nasat avangin tui hna kang chat tam tak a awm tih sawiin, tun dinhmunah tui connection 16,012 awm mek te sem chhuak vek tur chuan thla khat dawn nghah a ngaih tur thu an sawi a ni.

Mizoram Youth Commission (MYC), Hnah-thial Sub-Hqrs. YMA, Eleos Study Centre leh D&M Study Centre te tangkawp chuan Hnahthial District atanga Mizoram Police Constable hna exam pe turte tan Coaching Class, ‘Empowering Aspirants: Mizoram Constable Recruitment Coaching Class : 2025’ buatsaihin nimin khan a hawnna hun Govt. Hnahthial College Auditorium-ah neih a ni a, tun dinhmunah Coaching kal tur hi mi 40 vel in register awm tawhin Coaching hi nimin tlai atangin D&M Study Centre, Peniel Veng-ah neih tan nghal a ni.

Mizoram Cooperative Apex Bank Ltd. chuan nimin khan Special Meeting neiin kum 2024-2025 Financial Year chhunga sum chetvelna hrang hrang an thlirho a, kum 2024-25 closing dinhmun tarlan ah sum dahluh zawng zawng chu cheng vbc. 1694 niin, mipui hnena Loan a pekchhuah chu cheng vbc. 1218 a ni a, Deposit atanga Loan pekchhuah tehfung (CD Ratio) chu 72% a ni. Apex Bank hian Lalruatfeli Hlondo (Mafeli Hlondo) chu Apex Bank hmalaknate mipui zau zawk thleng thei tura tan lakpuitu (Brand Ambassador) ni turin nimin vek khan thawhdunna thuthlung an ziahpui nghal bawk a ni.

Commonweath Parliamentary Association (CPA), India Region, Zone-III chuan tun thla ni 2 atanga Vawiin thleng awh turin North East State-a Speakers leh Deputy Speakers' Executive Committee Meeting chu Sikkim khawpui Gangtok-ah an nei mek a, Mizoram atang pawhin Mizoram Assembly Speaker Lalbiakzama leh Dy. Speaker Lalfamkima te pawh an tel a, he hunah hian India hmarchhak Bial tana thawhhona tha zawk te, harsatna hmachhawn leh dolet tura hmalak tulna te an sawiho a ni. Heng zingah hian kawngpui dinhmun te, drugs hluar chho mek te leh lirnghing thulha tanho dan te telin NE-a Speaker leh Deputy Speaker te an tel kim hle a ni.

Aizawl atanga Lengpui panna kawng, Sihhmui Road-a Tlawng Lei (Bridge) dawh that hna thawh mek chu Tlawng lui chunga a awmna turah dawh kai tura peihfel a ni leh tawh a. Hna thawh hun chhung hian road block a ngaih dawn avangin leh hnathawktu ten tluang tak leh ngawrh taka an thawh theih nan naktuk, April ni 6, 2025 tlai dar 4:00 atangin April ni 8 (Thawhlehni) tlai dar 5:00 thleng Sihhmui leh Lengpui peng inkar kawng chu khar a ni dawn a. Hei vang hian hemi hun chhunga Lengpui Airport leh Mamit lam kal tur leh heng hmun atanga Aizawl-a kal tur lirthei te'chu Buichali lamah kal tur a ni ang. 

International Fund for Agriculture Development (IFAD), Design Mission Team te chuan nimin khan Lawngtlai leh Hnahthial District te tlawhin Fostering Climate Resilient Farming System in the North-East (FOCUS 2.0) project kalpui dan turah District thuneitute an kawm.

Urban Development & Poverty Alleviation Departmentchangtu Minister K. Sapdanga chuan Bio-medical Waste him zawka sawngbawlna tur ‘Common Bio-medical Waste Treatment Facility, Tuirial’ chu a taka hman tan a nih theih nan nimin khan Bio-medical Waste Collection Van panga a vailiam.

South Asian Football Federation (SAFF) inkhawmpui, SAFF Extraordinary Congress chu nimin khan Sri Lanka khawpui Colombo-a Shangrila Hotel-a neih a ni a, he hunah hian India aiawhin Mizoram Sports & Youth Services Minister Lalnghinglova Hmar chu a tel a, All India Football Federation (AIFF) Executive Committee Member a nih bakah Asian Football Confederation hnuaiah Social Responsibility Committee-ah member nilai a ni bawk.

Home Minister K. Sapdanga chuan Police Department chu mipui venghim tur leh thlamuantu tur an nih angin mipui thlamuanpui tlak a nun uluk a pawimawh thu a sawi.

Vantawng Group YMA Inkhawmpui neih mek chuan Zote South leh Kanghmun South te chu Serchhip Constituency-a rinluh a nih theih nan hmalak nise an ti.

Pradhan Mantri Ujjwala Yojana (PMUY) hnuaiah Serchhip District-ah hamthatna dawngtu mi 1891 an awm tawh.

Chief Minister Lalduhoma chuan nimin zing khan Zuangtui Veng-a PWD hmun a tlawh a, Zuangtui khawtlang hian an Veng-a sawrkar Middle School leh Primary School chu hun rei tak lei tlahniam huamchhunga a awm tawh avang leh thawmthat zui zel atana him tawh lova an ngaih avangin a sawnna atan PWD ram thenkhat chu ruahman turin sawrkar an ngen a. An dil hmun hi Chief Minister chuan a en a ni. Chief Minister hian Regional Institute of Paramedicals & Nursing Sciences College pawh tlawhin, a panna kawng sawrkarin siam that tura thu a lo dah tawh chu a en bawk a ni.

Sawrkar laipui-a Ministry of Consumer Affairs, Food and Public Distribution, Department of Food and Public Distribution thuchhuak angin, NFSA (Ration Card Eng leh Card Pawl) a hming chuang zawng zawngte tana e-KYC kalpui mèk chu April 30, 2025 thleng pawhsei a ni a. Hemi hmalama thuchhuah lo siam tawh angin e-KYC ti ve lo te hian a thlawna dawn tur Central Sawrkar in State Sawrkar-ah Ration buhfai a pék kèp tawh dawn loh avangin Card Eng leh Card Pawl a hming chuangte chu April 30, 2025 ralhma ngeia e-KYC ti ngei turin Supply Department chuan a hriattir bawk a ni.

Nimin khan Saitual DC Conference Hall-ah Zawlnghak, Sialkal leh Mawmrang Organic Farmer Producer Company Ltd. te leh IVC Agrovet Pvt. Ltd te chuan Sawhthing (Organic ginger) lei leh hralh chungchangah inremna thuthlung an ziak a, he inremna ang hian IVC Agrovet Pvt. Ltd. te hian Zawlnghak FPC, Sialkal FPC leh Mawmrang FPC te atangin Organic Ginger Metric Ton 1000 chu kg khat Rs. 30 in an lei sak anga, Mizoram Agricultural Marketing Board (MAMB) chuan tanpuina atan Rs. 20 belh lehin, a belhkhawmin Rs. 50 in heng FPC te hian an hralh thei dawn a ni.

Lunglei khawpui tui lakna ber Tlawng lui leh Pialthleng lui a kangchah deuh rih avangin March thla chho atang khan Lunglei khawpui chhungah tui harsatna a thleng mek a, tui tlem avang hian PHE Department chuan ni khat-ah tui hi darkar 9 atanga 13 vel chauh an pump thei a ni.

Nimin khan Aizawl-ah District Agricultural Marketing Committee (DAMC) buatsaihin an District chhunga Sawhthing hralhna chungchanga Secondary Collection Centre (SCC) puipa te tan training buatsaih a ni a, he huna tarlan a nih danin Aizawl District-ah hian Sawhthing lei nan Sawrkar atangin Procurement Fund 1st installment-ah cheng nuai 187.50 leh 2nd Installment-ah cheng nuai 187.50, a vaiin cheng nuai 375 dawn a ni tawh a. He Fund atang hian cheng nuai 138.087 man Sawhthing, quintal 2761.74 lei tawh niin sum hmanbang cheng nuai 236.913 a la awm a. Aizawl District chhungah hian Sawhthing quintal 26,759 lei tur la awm thei tura beisei a ni.

Mizoram Larsap, General (Dr) Vijay Kumar Singh chuan kumin a Republic Day lawmna pui ber New Delhi-a neih taka Republic Day Camp (RDC) 2025 a tel Mizo NCC Cadet 6, mipa 4 leh hmeichhia 2 te chu nimin khan Raj Bhavan-ah kawmin lawmpuina thilpek Tablet a hlan a. Larsap chuan ngaihhlut hlawh tak Republic Day Camp-a telpha leh Mizoram tihmingthatu NCC Cadet 6 te chhuanawm a tih thu sawiin, midangte tana entawntlak leh NCC zawm an chak ve zel theih nana hmahruaitu nih tum turin a chah a. NCC chu hna zawn nana pawimawh tak a nih mai piah lama mitha leh chhawrtlak chherchhuaktu a ni tih a sawi bawk. Republic Day Camp 2025-a Mizoram atanga telte hi 1st Mizo Air Squadron NCC atangin mi pathum, 1st Mizo Battalion NCC atangin mi pahnih leh 2 Mizo Battalion NCC atangin mi pakhat te an ni.

Mizoram-a Damdawi Zuartute pawl, Mizoram Chemists & Druggists Association chuan nimin khan Chief Minister Relief Fund atan cheng nuai 6 an hlan. Mizoram Chemists & Druggists Association hian tum danga an lo tih thin angin an Member Damdawi zuar hmun hrang hrang ami te thawh khawm atangin Chief Minister Relief Fund atan cheng nuai 6 chu Chief Minister Lalduhoma hnenah an hlan a. MCDA te hian a thlawna inentirna (Free Clinic) an lo buatsaih tawh bakah Burma leh Manipur Raltlan te leh ramri hrula Police duty te tan damdawi an lo thawn tawh thin bawk a ni. Mizoram Chemists & Druggists Association-ah hian Mizoram District hrang hranga damdawi zuartute telin member 4000 vel an awm mek a ni. 

Champhai Forest Division-a thawkte leh Assam Rifles tangkawp chuan Zokhawthar-ah ramsa tawlhruk leh a mawhphurtu mi 6 an man.

Hnahthial District Bawrhsap K.Vanlalruati chuan nimin khan Hnahthial by-pass road siam mek chu a hmunah a tlawh a, tun dinhmunah by-pass road black top (Dense Bituminous Macadam) loh metre za sarih (700m) vel a la awm thu he hunah hian tarlan niin a bak zawng hi chu black top vek tawh niin layer tawpna (Bituminous Concrete) phah chauh an hmabak tawh thu tarlan a ni bawk.

MPCC Spokesperson leh General Secretary Dr. Lallianchhunga chuan nimin khan Rual-lung, Mualpheng, Tawizo, Maite leh Lenchim te tlawhin heng khua a Sawhthing hralh dan a hmunah a en a, Sawhthing lei dan turah ZPM ten Research Based a zirchianna an neih lohzia a takin kan hmu nia sawiin, “ZPM sawrkar hotu leh Chief Minister ten thu thlum tak tak sawi reng mahse, kuthnathawktute harsatna an sutkian sak loh chuan awmzia a awm lo,” a ti bawk.

Chief Minister Lalduhoma chuan nikum April ni 1-a sawrkar in pawisa a neih chu cheng vbc. 520 niin kumin April ni 1-ah chuan cheng vbc. 1093 a nih thu a sawi.

Mizoram Police-a DGP Anil Shukla chuan ram thenawm Myanmar leh Manipur buaina avangin Mizoram-ah dan lova lut ruihhlo leh kuhva ro a hluar hle tih sawiin, hemi tihtawp tumin Mizoram Police ten theihtawp an chhuah thin tih a sawi.

Mizoram-ah nikum chhungin khualzin rawn lut mi 52,235 an awm a, heng zingah hian rampawn atanga khualzin mi 10,051 an awm a ni.

Chief Minister Lalduhoma chuan Aizawl khawpui atanga Assam Rifles insawnchhuah chungchang ah sawrkar hmasate pawhin thui tak kawng an lo sial tawh tih sawiin, helai ram chhunga ram nei mi 13 in vantlang tan an ram an pe chu thinlung takin lawmthu a sawi bawk.

Mizoram Electricity Regulatory Commssion (MZERC) chuan sawrkar kumthar April 2025 atanga Eng chhit/hman man chu chawhrualin Unit khat Rs. 7.82 ni turin a bithliah a. Eng chhit man hi tihsan a nih loh avangin sawrkarin subsidy a tum tur chu cheng vbc. 180.80 a ni dawn.

District Institute of Education and Training (DIET) Serchhip-a Training mek leh thawktute chuan nimin April 2, 2025 khan ‘Cleanliness Drive’ neiin faina hnatlangpui an nei a, he hunah hian 2nd Semester zirlaite leh Lecturer te thawkchhuakin Serchhip Sailiamkawn atanga Zawlpui panna kawng thenfai hna thawkin Serchhip-Thenzawl ADB Road atanga Zawlpui peng thleng kawng dung-a bawlhhlawh te thianfaiin an chharkhawm a. Hei bakah hian Mat Phai Chawm kai-a Lei bul vel leh Mat luidung thenfai hna thawk nghal bawkin Plastic leh tawih thei lo bawlhhlawh te chharfai hna an thawk a, heng bawlhhlawh an chharkhawm te hi Serchhip Dumping Ground-ah an paih bawk a ni. He hnatlangpui-a thawk te chuan bawlhhlawh chhar tur thahnem tak a awm thu sawiin, mipuite pawhin kawngkam-a bawlhhlawh paih mai mai loh kan zir a tul hle nia an hriat thu an sawi bawk.

Mizoram-a District pahnih-ah African Swine Fever (ASF) hri hmuh a nih leh tawh avangin he hri laka Serchhip District a him theihna turin hma lak mek a ni a, khaw hrang hrangah he hri leng chungchang inzirtirna hi neih chhoh leh mek a ni bawk. Hetihlai hian nimin khan ASF avanga Vawk thi hi 65 chhinchhiah leh niin Vawk 7 suat leh a ni bawk a, heng te hi Lawngtlai District a mi te vek an ni. AH & Vety Department in an chhinchhiah danin kumin (2025) hian Mizoram District 2-a khaw 14-ah ASF hmuh a ni tawh a, Vawk 614 thi tawhin Vawk 114 suat a ni tawh bawk a ni.

Nimin April 2, 2025 atang khan Govt. Ser-chhip College-ah ni thum chhung awh tur ‘Mathematics Summer Camp’ neih tan a ni.

Mizoram State Health Care Society (MS-HCS)-a CEO Dr. Biakthansangi chuan Mizoram Universal Health Care Scheme (MUHCS) thar a Cashless System chu damlo miharsate rilru hahna chhawktu a ni dawn tih a sawi.

State Bank of India (SBI) Economic Research Department chuan nimin khan Report tichhuakin Pradhan Mantri Mudra Yojana (PMMY) chu hmeichhiate sum leh pai dinhmun chawikanna kawnga hmanraw tangkai tak a nih thu leh he Scheme hnuaia hamthatna dawngtu mi vbc. 52 zinga 68 chu hmeichhia an nih thu an tarlang.

Lawngtlai District-a Bualpui (NG) ramchhung Serzawl kawngah nizan hmasa khan Assam Rifles, Mizoram Police leh YLA tangkawp chuan Methampetamine Mum 42000, Kg 4.600 a rit an man a, tualchhung hralhnaa chhutin cheng nuai 59.8 man niin a kengtu Myan-mar lam mi nia hriat pawh man nghal a ni bawk.

Tunhnaia Myanmar ram-a lirnghing tuarte tanpuina atan India chuan ‘Operation Brahma’ hnuaiah hma a la mek a, Indian Air Force sipai thlawhna C-17 Globemaster chu niminpiah khan lirnghing tuarte mamawh tur tam tham tak phurin Lengpui Airport-ah a rawn tum a, heng bungrua lirnghing tuarte tanpuina tur hi Assam Rifles ten Zokhawthar-ah Truck hmangin an chhek chho dawn a, heta tang hian Myanmar ram chhunga Chin State paltlangin lirnghing tuarte tanpuina atan pek an ni ang. Hei bakah hian India hian chhanchhuah hnathawh a pui mek bawk a ni.

Nimin khan Khawzawl DC Conference Hall-ah Bawrhsap K. Vanlalthiana hovin ruihhlo do chungchang sawiin Narcotics Coordination Centre (NCORD) thutkhawm neih a ni a, he hunah hian Police leh Excise and Narcotics lamin ruihhlo do kawnga harsatna an tawh chungchangte leh ruihhlo man a tlawm avanga ruihhlo ngai an tam tawh thu leh ruihhlo vanga man Court-ah thiamloh chantir a har tawh thu te leh thawhhona lama harsatna an tawh chungchang te an sawi a, mi tam thei ang berin ruihhlo do chungchang an hriat theih nana mipui zirtirna nasa zawka kalpui a tul thu an sawi bawk.

Finance changtu Chief Minister Lalduhoma chuan sawrkarin inrenchemna a kalpui avangin cheng nuai 240 chuang humhim a nih thu Social Media kaltlanga Mizoram sum chungchang a tarlan ah a tarlang a, Financial Year hluiah Mizoram sawrkar chuan Closing Balance cheng vbc. 930 vel a neih thu tarlangin, nikum lam khan cheng vbc. 500 vel an lo nei tawh thu a tarlang bawk. Chief Minister chuan Sawrkarin Inrenchemna a kalpui pawh an hlawkpui thawkhata a hriat thu sawiin, kawng hrang hranga inrenchemna kalpui a nih avangin Secretariat leh office hrang hrang atanga kum khat chhunga sum humhim (save) zat chu cheng nuai 240 chuang a nih thu a sawi a ni.

Mamit Hmar Veng Multipurpose ALF Cooperative Society Ltd. te'n an enkawl Disposable Paper Cup Machine chu nimin khan Mamit DC K. Laltlawmlova chuan a hawng a, Mizoram tana Disposable Cup siamchhuahna hmasa ber tur Cooperative Society hnuaia Mamit Hmar Veng Self Help Group te'n an enkawl hawn theih a ni ta chu lawmawm a tih thu sawiin, tangkai taka hman a nih theih nan duhsakna a hlan a ni. He hunah hian Mamit DCO Lalthangfala chuan Disposable cup siamna khawl hi Cooperative Department-in cheng nuai 22 senga an bun a nih thu leh 70% Loan leh 30% subsidy a ni tih a sawi a. Minute 1 ah dispo No 100 siamchhuak theiin darkar 1 ah No 6000 a siamchhuak thei a ni.

Mizoram sawrkar chuan Consultant pali nei mekin thla khatah cheng sing thum chuang vek an hlawh bakah zin bill siamsak an ni.

Mizoram Quarry Association chuan Mizoram-ah Quarry permit nei lova lung la leh her tam tak an awm thu an sawi.

India khua leh tuite hnena pek thin nihna tihchianna (identity card) hrang hrang chu ramdang mi, a bikin thenawm ram Myanmar leh Bangladesh atanga chhan hrang hrang avanga lo lutte hnena pekchhuah a nih loh nana hmalak dan tur chu nimin khan Lunglei-ah sawiho a ni.

School Education Minister Dr. Vanlalthlana chuan nimin khan New Delhi-ah National Council of Educational Research and Training (NCERT) hotute a kawm.

Mizoram-a Fostering Climate Resilient Upland Farming Systems in the North East (FOCUS) 2.0 kalpui tur atan inbuatsaihna kalpui mek niin nimin khan Lunglei leh Siaha District-ah hemi chungchang sawihona hi neih a ni.

Mizoram Larsap General (Dr) Vijay Kumar Singh chuan nimin khan lehlangin Lawngtlai District a tlawh a, sawrkar hotute a kawm bakah Diltlang South-a kangmei tuar te tanpuina a hlan bawk.

 

School Academic Session thar atan Samagra Shiksha Serchhip District chuan Zirlaite hnenah a thawh khatna atan Zirlaibu an semchhuak fel ta a, zirna In hrang hrang ten zirlai naupang an neih zat hriatchian theih a nih hnuah sem chhunzawm leh tur a ni ang.

Village Council Inthlanpui neih zawh taka Serchhip District-a thlantlin te tana Orientation Training hmasa ber chu nimin kan neih tan a ni.

Nimin khan Serchhip DC Meeting Hall-ah District Agriculture Marketing Committee (DAMC) Serchhip buatsaihin Serchhip District chhunga Secondary Collection Centre (SCC) enkawltute tan training buatsaih a ni.

Serchhip-a Election Officer leh DCIO hna chelh mektu F. Lalnisai chu Aizawl District-ah Assistant Commissioner hna chelh tura sawn a ni a, he hna chelh mektu Lalchhanhimi chuan a rawn thlak dawn a ni. Hemi rual hian Serchhip SDO (Sadar) hna chu Rebecca Laldinmawii Hrahsel chuan thawk chhunzawm lehin Gaston Vanlalhriatpuia chuan Setflement Officer leh DUDO hna te a chelh chhunzawm dawn a ni.

Chief Minister Lalduhoma chuan nimin khan East Lungdar-ah ‘Tuichangral Championship 2025’ chu hawngin Tuichangral Championship chu naupang talent zawn nan an hman dawn thu a sawi.

Siaha District-ah Mizoram Sawrkar Flagship Programme ‘Bana Kaih’ hnuaia Sawhthing lei leh hralh hna kalpui mek a ni a, an District ah hian Secondary Collection Centre (SCC) pahnih awmin Tipa SCC atangin Sawhthing kg. 61,124 lei tawhin kg. 34,119 hralh a ni tawh a, Siaha SCC-ah Sawhthing kg. 51,938 lei tawhin kg. 45,505 chu hralhchhuah a ni tawh bawk a ni.

Mizoram Governor General (Dr) Vijay Kumar Singh chuan Vawiin hian Lawngtlai District a tlawh dawn a, Governor dawnsawn dan tur hi nimin khan Bawrhsap Cheemala Siva Gopal Reddy IAS hovin sawiho a ni. Governor hian Helicopter hmangin Lawngtlai hi a thleng anga, sawrkar hotute nen inkawmin an District dinhmun te an thlirho dawn a ni.

Moriah Association for the Blind-a Board Member leh Zirtirtute chuan kum 2005-a kum 5 mi ni-a an enkawl, N. Vahneichhi s/o N. Ngohu chu MIS-a tlin avangin lawmpuina an hlan a, N. Vahneichhi hi Mizoram Information Sevice (MIS)-ah tlingin tunah hian IPRO hna a chelh mek a, Moriah Association for the Blind hian lawm-puina thuziak hlanin an Chairman Dr. H. Lallenmawia leh Founder Vice Chairman PB. Sangthanga te chuan thu an sawi a, Vahneichhi pawhin he hunah hian lawmthu a sawi bawk a ni.

Nimin khan Lunglei-ah District Bawrhsap leh District Disaster Management Authority (DDMA) Chairman Navneet Mann hovin Fur lo thleng tura chhiatna hrang hrang thleng thei laka inpuahchahna sawiho a ni a, DDMA Chairman chuan Mizoram-ah Fur ruahsur avangin khuarel chhiatna hrang hrang - leimin, tuilian leh chumi avanga kawng pingte'n nunna leh In leh lo channa a thlen bakah nunphung pangngai a tihkhaihlak thin avangin heng chhiatna thleng thei lakah hian inralrin lawk a tul thu a sawi a. Hmasawnna hna thawh hrang hrangte chu Fur thlen hmaa thawh zawh a nih theih nan leh chhiatna thleng thei laka himna turin Works Department-te leh a bikin kawngpui zauh hna thawh mek enkawltu NHIDCL te chu chak taka hma la tura chahin, Department hrang hrangte pawh eng, tui, kawng, buhfai, ni tin mamawh, hriselna kaihhnawih leh thil dangah Fur laia harsatna a awm loh nan mahni zawn theuhah inpuahchah turin a chah a ni.

ZPM Party chuan Kalphungthar mipui Sawrkarah Mizoram sum dinhmun in hma a sawn chho hret hret niin an sawi.

Mizoram sawrkar ah Secretary 29 awmin pakhat enkawlna atan hian thla tin cheng nuai 2.27 vel zel sen a ni a, an vaia enkawlna atana thla khata sen chu cheng vbc. 6.61 chuang a ni.

Lawngtlai District chhung Bualpui (NG) a Raltlan awm mek te chu niminpiah khan Mizo-ram Police, Assam Rifle, VC leh Young Lai Association te nen inkawmin thawhhona tha an neih theih nana tangkai chi hrang hrang an sawiho.

Mizoram Governor General (Dr) Vijay Kumar Singh chuan Hnam ziarang leh nunphungte kan inhriatpawhtawn hian India ram inpawh leh nghet kan siam thei tih a sawi.

Mizoram State Central Library in a chhinchhiah danin nikum April atanga kumin March thla thleng khan Mizoram State Central Library-ah mi 548 an in ziaklut a, MSCL a inziaklut zawng mi 10,113 an awm tawh a ni.

Mizoram-a FOCUS kalpui chu a tawp tak avangin ‘FOCUS 2.0’ chu kalpui a ni leh dawn a, nimin khan FOCUS 2.0 Design Mission Kick-Off hun chu Aijal Club-ah hman niin he hun hi Agriculture Minister PC. Vanlalruata chuan a hmanpui a, Mizoram-ah Agriculture-in hma a sawn theihnan chuan 'Farm connectivity' a pawimawh hmasa tih a sawi bawk.

Health Minister Lalrinpuii chuan Mizoram mipui hriselna enkawlna changtlung zawk 'Mizoram Universal Health Care Scheme' hlawhtling taka kalpui nan Health Department thawmthat a pawimawh thu sawiin, thawktu engemaw zat lakna tur kalpui mek a nih thu a sawi bawk.

 

School Academic Session thar, 2025-2026 a zirlai naupangte hnena a thlawna Zirlaibu sem tur chu semchhuak tura hmalak mek niin Serchhip District-ah pawh Vawiin hian a thawh khatna ni turin Zirlaibu hi pekchhuah tan a ni dawn a, hemi hnu hian a tahtawlin Zirlaibu hi pekchhuah zui zel tura ruahman a ni. Nikum December 4-a Mizoram sawrkar School Education Department in thuchhuah siama an tarlan angin Academic Year 2025-2026 atan Primary School atanga Higher Secondary School te chu tun thla ni 7 khian hawng tanin zirna hi kalpui tan a ni leh taw dawn a ni.

Serchhip District Volleyball Association (SDVA) buatsaih ‘District Volleyball Championship’ leh ‘Age Group Volleyball Tournament-2025’ chu nimin khan Serchhip Vengchung Volleyball Court-ah khelh tan a ni.

Mizoram hmun thenkhat ah African Swine Fever (ASF) avanga Vawk thi awm belh leh mah se he hri leng lakah hian Serchhip District chu a la him nia hriat a ni.

Govt. Serchhip College ram chu Khawte-tlang panna kawng in a paltlang avangin he kawng hmang lova Khawtetlang kalna kawng hi siam turin hmalakna kalpui mek a ni.

Vawiin atanga a taka hman tura ruahman pawisafai pek ngai lova damdawi lama inenkawl theihna tur, Mizoram Universal Health Care Scheme (MUHCS) chu pawl pahnih in an duh lo tih an sawi.

Mizoram sawrkar chuan Vawiin, April 1, 2025 atang hian Mizoram Universal Health Care Scheme (MUHCS) chu hman tan a tum a, Vawiin atangin District chhunga Health Sub-Centre leh Health & Wellness Centre-ah te inziahluhna hun hawn tan a ni ang.

Mizoram Poor Federation chuan nimin khan Aizawl Press Club-ah thuthar thehdarhtute kawmin sawrkarin Vawiin atanga Mizoram Universal Health Care Scheme hman tura a ruahman chu lawmawm an tih thu an sawi a. Hetihrual hian sawrkar hnathawk, ram budget atanga za zela 82 vel hlawh leh inrelbawlna atana hmangtu, mipui chawm ten sawrkarin an hlawh atanga thla khata an thawh tur a bituk-a an tha a na tlat chu mahni hmasialna niin an sawi a. Hospital neitute pawh mi harsate dinhmun hrethiama MUHCS chu hmang se an duh thu an sawi bawk a ni.

Kolasib District Jail-a tang, damlohna avanga Kolasib District Hospital-a enkawl a nih laia tlanchhuak Seikholen Khongsai chu nizan hmasa khan Kolasib Police ten Silchar-ah an man. Seikholen Khongsai hi nikum August 21 khan ruihhlo kaihhnawih ah a thiante nen man niin tunhnai khan Awm chhung nà leh khawsik avangin Doctor hnenah hruai a ni a, Doctor thurawn angin kar kalta Ningani khan Kolasib District Hospital-ah admit niin Inrinni zan khan a vengtu inthiar hlanin a tlanchhuak a, Pathianni zan-ah man a ni leh nghal a ni.

Samagra Shiksha, Lawngtlai District hnuaia Cluster 4-a zirlai naupangte hnena sem tur zirlaibu chu nimin khan Lawngtlai East Bialtu MLA leh Adviser to Chief Minister Dr. Lorrain Lalpek-liana Chinzah chuan Lawngtlai atangin a vailiam a, kumin hian pawl khat atanga pawl riat thleng te tan zirlaibu hi semchhuah leh tura ruahman niin Lawngtlai District-a a thawh khatna atana sem tura vailiam te hi Lungtian Cluster, Vathuampui Cluster leh M. Kawnpui Cluster leh Bungtlang South Cluster hnuaia School hrang hranga pek tur a ni a, a tahtawla thawn zel tum a ni bawk.

Inrinni kalta, March 29, 2025 zan khan Cham-phai Bethel Veng-a cheng Pausianmuanga (28) s/o GK. Manga chu Champhai Chhangphut Field ah chesualin damdawi In panpui a nih laiin a boral nia thudawn a ni. He thihna thleng chungchang ah hian rinhlelh tur a awm ngeia an hriat avangin MZP Hqrs. Champhai chuan Champhai Police Station-ah FIR an thehlut a, Police ten hmala nghalin a mawhphurtua puh mi pakhat Lalruat-thara, Champhai Kanan Veng ni-a insawi chu Inrinni zan khan Champhai Police kutah a in pe a; Champhai Police-in an chhui zuina kal zelah thu zawhfiah turin mi 6 an man belh leh tawh nia thudawn a ni bawk.

Kum 2024-2025 sawrkar kum-a ni hnuhnung ber nimin khan Finance changtu Chief Minister Lalduhoma chuan Aizawl North Treasury leh South Treasury Office a tlawh a, Chief Minister chuan sawrkar kum khar a lo hun leh tak thu sawiin, Finance Department-a thawktute, kan Treasury Office hrang hranga thawktute zarah engkim fel fai takin kan inching fel thei chu lawmawm a tih thu a sawi a. “Kumin ah hian cheng vbc. 900 chuang hret kan chhuahpui dawn a, nikumah khan cheng vbc. 500 vel kan chhuahpui thung a. Hei hian kan sum leh pai dinhmun a lo that deuh deuh zia a tilang a ni,” a ti.

Mizoram chu Artui-a a intodelh theihna turin Sawrkar hian hma a la mek zel tih AH&Vety Department hotute chuan an sawi.

Public Health Engineering (PHE) Department Engineer-in-Chief H. Duhkima chuan Jal Jeevan Mission (JJM) hnuaiah Mizoram-a thingtlang khua zawng zawng tui connection pek ni tawh mah se khaw thenkhat tuia harsatna nei an awm leh tawh thu a sawi.

Aizawl Mosque Committee leh Mizoram Muslim Welfare Society-a General Secretary Mohammad Mamon Majumdar chuan Mizoram a hnathawh tum emaw, hnathawka awm lai mek hnamdang te tan Inner Line Permit (ILP) chu neih ngei ngei a tul thu a sawi.

Mizoram sawrkar hnuaia sumdawng tura din Corporation hrang hrangte enkawlna atan sawrkar chuan kumtin cheng vaibelchhe 21 leh nuai 52 chuang a seng thin.

Home Minister K. Sapdanga chuan nimin khan Aizawl-a YMA Zawlbuk tlawhin Central YMA hruaitute a kawm a, ruihhlo do kawnga YMA te hmalakna a thlawp tlat tih a sawi.

Aizawl khawpui faina turah Mizoram Sawrkar in ngaihtuahna nasa tak sengin hmalakna leh hmachhawp hrang hrang te a nei mek thu UD&PA Department changtu Minister K. Sapdanga chuan a sawi.