Aizawl International Half Marathon neih a ni

Mizoram sawrkar Sports & Youth Services Department, Athletic Federation of India leh Innovations India Pvt. Ltd. te tangkawp buatsaih, Aizawl International Half Marathon (AIHM) chu Inrinni khan neih a ni a, Sports Minister Lalnghinglova Hmar chuan kumtin buatsaih an tum tih a sawi.

Aizawl International Half Marathon hi Inrinni zing dar 6:30 khan Aizawl Mualpui-a Rajiv Gandhi Stadium atangin tlan tan a ni a, he intlansiakna ah hian hriat theih chinah mi 1075 an inziaklut a, hetihlai hian mi 400 chuang vel an tlan nia thudawn a ni. Intihsiakna hi hlawm thum a then niin, Half Marathon; Open Race bakah Fun Race te a awm a, RG Stadium atanga bul tanin, Aizawl khawpui chhuahlam World Bank Road-ah tlanin RG Stadium-ah bawk a tawp leh a, a tel tam zawk te hi thalai kum 25 atanga kum 40 inkar te an ni a, hriat theih chinah tlan zinga upa ber chu kum 90 mi VL Bela, Electric venga cheng a ni.

Aizawl International Half Marathon kharna hun hi Larsap General (Dr) Vijay Kumar Singh (Retd) chuan hmanpuiin a vawikhat nan hlawhtling taka Mizoram International Half Marathon Aizawl khawpuia buatsaih a ni chu lawmawm a tih thu sawiin, tun aia changtlung leh lian tham zawk, mipuite ngaihhlut leh tam zawk tel theihna buatsaih tum a nih thu a sawi a. A hlawhtlin theih nana theihtawp chhuahtu Sports Minister, Athletic Federation of India, Innovation India Pvt. Ltd. leh anmahni tawiawmtute fakawm a tih thu sawiin, taksa hriselna leh insawizawi ngai pawimawha Marathon tlan zawng zawngte chu tun atanga lo inpuahchak lawka tlan chhunzawm zel turin a chah a. Mizoram IHM chu India rama intihsiakna Event mipuite ngaihven hlawh ber a nih thuai a beisei thu a sawi bawk.

Sports & Youth Services Minister Lalnghinglova Hmar chuan thawhhona tha tak hnuaia hlawhtling taka Mizoram International Half Marathon hmawrbawk a ni chu lawmawm a tih thu sawiin, Mizoram mai bakah State pawn atanga lo telte fakawm a tih thu a sawi a. Nakum ah pawh Aizawl International Half Marathon chu buatsaih leh tum a nih thu sawiin, a hun atan Valentine's Day, February ni 14, 2026 ruat a nih thu leh tun aia tam zawk an tel ngei a beisei thu a sawi a. Kumin Aizawl International Half Marathon-a tel zawng zawngte chhuanawm a tih thu a sawi bawk.

AIHM 2025-ah hian Half Marathon (21.1 Km)-ah Hmeichhia-ah Tamsi Singh chu pakhatna leh Mipa-ah Heman Singh chu pakhatna niin lawmman ah Rs. 1,25,000 an dawng ve ve a, Open Race (10 Km)-ah Hmeichhia ah Thelma Lianhmingthangi leh Mipa-ah Sushil chu pakhatna niin Rs. 50,000/- ve ve an dawng a, Fun Race (5 km)-ah Hmeichhia-ah Malsawmdawngkimi leh Mipa-ah Daniel Lyngdoh Wahlang te pakhatna niin Rs. 20,000/- ve ve an dawng a, Junior Category (5 km)-ah Krishna Kant Sahu chu pakhatna a ni bawk.