State pahnih Secretary-Level Meeting nei turin Mizoram Palai ten Guwahati an pan

Mizoram leh Assam ramri chungchanga State pahnih te Secretary-Level Meeting Vawiin-a nei turin nimin khan Home Secretary Vanlalmawia hovin palai mi 7 te chuan Guwahati khawpui an pan.

Home Department hotute sawi danin Mizoram leh Assam Official-te inbiakna turah hian ramri buai chungchanga a hma lama lo sawi tawh leh State pahnih la inrem theih lohna te sawiho lehin kimchang taka thil awmdan inhrilh tawn tura ruahman a ni a. He inbiakna tur chungchangah hian Mizoram sawrkar atanga thu ken turte leh pawimawh dang chi hrang hrang te chu April ni 16 khan Home Minister K. Sapdanga hovin sawiho a ni a, Home Minister chuan ramri him tak, mipuite thlamuang taka an khawsak theihna tur nawrchhuah chu an thupui ber a nih thu a sawi a ni.

Home Minister K. Sapdanga chuan Mizoram tana channa awm lo tura theihtawp chhuah a nih thu sawiin, Mizoram leh Assam ramri zirchiang tur Study Group member 4 awmna pawh kumin January ni 25 khan din a nih thu leh he Study Group hian chhuanawm takin hma an lak thu leh, anni zarah document tanchhan tur pawh an nei tha tawk tawh hlea an inhriat thu a sawi a. Mizoram aiawha ramri chungchang inbiakna a palai kalturte pawh an inpuahchahna a tha thawkhata a hriat thu a sawi bawk.

Thudawn danin Vawiin-a Official-te an inbiakna rahchhuah a zirin Mizoram Home Minister leh Assam Border Protection & Development Minister te a vawi ngana atana inbiakna chhunzawm tura ngaih a ni a. Tun tumah hian ni khat chauh inbiak phawt tur a ni a, thil awmdan a zirin Official-te inbiak chhunzawm leh rawt a ni mai thei bawk ni a thudawn a ni.

Mizoram leh thenawm State Assam in ramri chungchanga buaina an neih hi July ni 26, 2021-a Vairengte dai-a Police-te’n silai hial an hmehpuah avangin a chinfel dan tur hi chak zawka dap a ni ta a. Hemi kum vek hian Assam Border Protection & Development Minister Atul Bora hovin Assam palaite Aizawl-ah lokalin khatih laia Home Minister Lalchamliana hovin Mizoram palaite nen an inbia a. A kum lehah Aizawl-ah bawk inbe lehin kum 2022 November thla khan Guwahati-ah Minister pahnih kaihhruaite hi an inbe leh a. Nikum August 9 khan Aizawl-ah inbiakna nei lehin Vawi tam tak State pahnih palaite bakah Chief Minister ve ve pawh inbe pawhin ramri buai erawh chinfel ala ni rihlo a ni.