Chanmari FC chu I-League khel turin an tling ve leh ta

Aizawl-a Chanmari FC chu Season thar ah I-League khel turin an tling a, Season thar ah Mizoram atangin I-League Club pahnih an awm thei dawn a ni.

Chanmari FC hian Season thar a I-League khel tumin tun Season-ah I-League 2 an khel a, Inrinni khan an match hnuhnung ber dawttu khelin Mualpui-a RG Stadium-ah khual mual-a an hneh tawh loh Diamond Harbour lakah 1-0 in an tlawm leh a. Amaherawhchu, inkhel dangah an dinhmun luahlan theitu awmchhun Sporting Club de Goa chu FC Bengaluru United nen goal khat ve ve inpe-a an inhnehtawk avangin Chanmari FC hi lehpel thei an awm tawh lova. Season thara I-League khel turin an tling ta a ni. I-League 2-ah hian Diamond Harbour Football Club chu Champion in Chanmari FC nen hian Season tharah I-League khel turin an tling ta a ni.

Chanmari Football Club hi kum 2011-a din niin Mizoram Premier League Champion vawi hnih an lo ni tawh a, Independence Day Cup ah te pawh champion in Mizoram Football-ah sulhnu ropui tak a nei tawh a. I-League 2-ah hian match 16 khelh tur neiin match 15 an khelh ah hian tum 9 chakin tum thum ve ve chak loh leh inhnehtawk an nei a, point 30 an hmu a. Heng match 15 an khelh tawh ah hian goal 28 khungin goal 10 an chhuah a, Diamond Harbour Football Club nen hian an goal khung leh chhuah hi a inzat chiah a ni.

Mizoram atangin Aizawl FC chuan i-League hi khel mekin Season thar ah Chanmari FC in I-League an khelh ve dawn tak avang hian Mizoram atangin I-League Club pahnih an awm dawn ta a, Chanmari FC Coach Rochhingpuia chuan I-League khel thei tura an inpet kai chu lawmawm a tih thu sawiin, Player te leh Coaching Staff te thawhrimna a ni tih a sawi a. Aizawl FC President Robert Romawia Royte pawhin Chan-mari FC a lawmpui thu a sawi bawk a ni.