Lawngtlai-ah Patient Attendants Shelter hawng

Lawngtlai East Bialtu MLA leh Adviser to Chief Minister Dr. Lorrain Lalpekliana Chinzah chuan nimin khan Lawngtlai-a Christian Hospital-ah Patient Attendants Shelter a hawng.

Hemi puala inkhawm neih ah Lawngtlai East Bialtu MLA chuan UD&PA kaltlanga 'Center for Urban Wellness Scheme' hnuaia Patient Attendants Shelter tha tak sak a ni chu thil lawmawm tak a ni tih sawiin, Sawrkarin mipuite harsatna tawh sukiang turin hmalakna nasa tak a neih thu leh Department hrang hrang hotute pawhin theihtawp an chhuah thu a tarlang a. Patient Attendants Schelter chu Christian Hospital Campus-a awm a nih angin hun lo kal zel turah a neitu leh enkawltu tur an nihna hria a, thawktute pawhin neitu rilru pu a tangtai taka hmang leh enkawl turin a chah bawk.

Nimin-a hawn tak Patient Attendants Shelter hi Rs.46,79,600/- senga sak niin a dung ft. 30 leh a vang ft. 45 a ni a, Room pathuma then niin, Khum 10 ve ve awmin Boys & Girls Dormitry bakah Living room, Kitchen Bathroom 5, Tui litre 5500 dahna tur, Solar Water Heater leh Solar Inverter te dah a ni bawk a. September 21, 2023 khan sak tan niin nikum November 10 khan sak zawh a ni.