Mizoram State Sports Council (MSSC) Golden Jubilee lawmna neih tan a ni

Kum khat chhung awh tur Mizoram State Sports Council (MSSC) kum 50 tlinna, Golden Jubilee lawmna chu nimin khan neih tan a ni.

MSSC Golden Jubilee lawmna hi Vaivakawn Cultural Centre & Auditorium-ah neih niin MSSC President hmasa ber leh Ex-Minister Dr. H. Thansanga chuan Khuallian niin Golden Jubilee lawmna hi a hawng a, kum 1976-a MSSC a din tan tirha hma an lak dan leh din tura harsatna tam tak an paltlang dan te sawiin, kum 50 hmel a hmu ta chu ropui a tih thu leh lawmawm a tih thu a sawi a, hetih hun chhung zawnga MSSC hruaitute inpekna ropui a tih thu a sawi bawk. MSSC chu rambuai laia Mizo thalaite nun sahawk leh kal ngaihna hre lo te an awm awl mai mai loh a, awmze nei a an nunphung herrem a nih beiseia din a nih thu sawiin, hun lo kal zelah huang zauh a ni zel ta chu hmasawnna ropui tak a nih thu a sawi a. Infiammite chu rilru fim leh thianghlim pu a, taimakna leh tawrhchhelna nei tura fuihin, India ram mai bakah khawvel huapa Zofate tihmingtha tura theihtawp chhuahzel turin a fuih a. Sports Minister-in Olympic-a Mizo thalaite an tel ngei theihna tura ruahmanna tha tak a siam chu lawmawm a tih thu sawiin, theihtawp chhuaha thlawp tlat turin Zoram mipuite a sawm a ni.

Golden Jubilee lawmna-ah hian Sports Minister Lalnghinglova Hmar chuan inlawmna thu sawiin, MSSC in kum 50 hmel a hmu ta chu ropui a tih thu sawiin, hruaitu hmasate leh MSSC a thawktute chungah lawmthu a sawi a, tun dinhmuna Mizoram in Sports-a a thlen chin chu a lawmawm rualin hmasawn belhna tur kan la ngah hle tih a sawi a. Golden Jubilee puala T-Shrit siam leh Souvenir ‘Nghilhloh Bu’ tih te chu tlangzarh a ni bawk.

Mizoram State Sports Council (MSSC) hi April ni 20, 1976 khan Executive Order hmanga din a ni a, The Mizoram State Sports Council Act, 2002 hmangin inrelbawlna leh kalphung mumal zawka tihchangtlun niin tun dinhmunah MSSC hnuaiah hian State Level Sports Association 34 an inziaklut a, Jubilee pual hian kum khat chhungin Sports Association tin hian Mizoram pum huap Tournament pakhat theuh an buatsaih dawn a, hemi atan hian Calendar mumal tak siam a ni tawh a ni. MSSC Golden Jubilee pual hian nimin zing khan Golden Jubilee Torch (meichher) Relay neih a ni a, Bawngkawn atanga tanin Sports Association 34 aiawh ten Aizawl khawpui chhungah meichher inpe chhawngin, Sports Minister Lalnghinglova Hmar, MFA President ni bawk chuan Aizawl Tennis Court-ah a tlan luh pui a, inkhawm tawite neih zui a ni a. He Meichher hi Golden Jubilee lawmna inkhawmah hian tlan luhpui niin MSSC President, Sports Minister ni bawk Lalnghinglova Hmar chuan khuallian Dr. H. Thansanga hnenah hlanin meichher dahna tur bik ruahmanah a phun a. Golden Jubilee meichher hi kumtluanin Sports Association hrang hrang ten Golden Jubilee pual tournament an buatsaihah tarchhuah thin a ni ang.