NCORD Meeting in ruihhlo dona a hmalakna an thlirho

Serchhip District-a ruihhlo dona kawnga hmalakna hrang hrangte thlirin nimin khan Ser-chhip District Narco Coordination Committee (NCORD) chu Bawrhsap hovin an thukhawm.
Serchhip DC Meeting Hall-a thutkhawm hi an Chairman leh Bawrhsap Paul L. Khuma chuan kaihruaiin thutkhawm hnuhnung ber March 5, 2025 atanga nimin, April ni 23, 2025 thlenga an hmalakna te thlirho a ni a. Serchhip District Police-te chuan April ni 22 zan khan Heroin gram 1.84 a rit, Rs. 5,520 man leh a neitu an man a, ND&PS Act hnuaiah thubuai an ziaklut nghal a ni. Excise and Narcotics Department chuan report hun chhungin ganja 51.75gm a rit an man bawk.

Health Department-a Food & Drug Administration chuan damdawi ruihtheih peptica mum 130 leh spasmolar mum 200 chu Lung-chhuan khua ah an man a. Spasmend mum 180 leh Tumispas mum 195 chu North Vanlaiphai-ah an man bawk. Myanmar chhuak theitui, alcohol tam tham tak awm tel nia ngaih chu enchhin tura lak niin March 10, 2025 khan Aizawl-ah an thawn a. Alcohol content sang tak a awm tih hmuhchhuah niin Serchhip DC chuan he theitui zawrh khapna hi a tichhuak dawn a ni.

District Narco Coordination Committee (NCORD) hi ruihhlo dona kawnga thawktu sawrkar Department hrang hrangte telna niin NCORD Meeting hi thla tin neih thin tura ruahman a ni a, Meeting-ah hian an hmalakna kal mek te thlirho thin a nih bakah hmalak zel dan turte pawh sawiho thin a ni bawk.