Kum upa, tawnhriat ngah tawh tak takte Mizo khawtlangah an hlu - Home Minister

Home Minister K. Sapdanga chuan kum upa, tawnhriat ngah tawh tak takte chu Mizo khawtlangah an hlu hle tih a sawi.

Mizoram Upa Pawl General Assembly vawi 50-na nimin-a Aizawl Vanapa Hall-a neih a hmanpuina Home Minister K. Sapdanga chuan kum upa, tawnhriat ngah tawh tak takte chu Mizo khawtlangah an hlu hle tih sawiin,thangthar ten heng kan rohlu te hlut thiam leh zahthiam chu kan mawhphurhna pawimawh tak a nih thu a sawi a. Kum lam a upa, tawnhriat ngah tak takte intel-khawmna pawl, MUP din a nih atang hian khawtlang leh ram inkaihhruaina ah an thawhhlawk tih sawiin, an upatpuite harsatna sutkianna kawngah pawh pawl tangkai leh pawimawh tak an nih thu a sawi bawk. Home Minister chuan MUP chu Mizo nunze mawi, khawtlanga nungchang mawi, tlawmngaihna chawinunna kawngahte leh aia upa zah inziritir kawngah te thawktu tangkai tak an nih thu a sawi a. MUP hmalakna a chhuanchham leh mi harsate tanpui leh dawmkan hna an thawk thin chu entawntlak a tih thu a sawi bawk a ni.

Pawl dinchhan leh thil tumte tihhlawhtlinna kawnga hma an lak thinna chu fakawm a tih thu Home Minister K. Sapdanga chuan sawi bawkin, Kum upat vanga mahni inchhung ngei a inthlahrun phah te chu thil awm thei a nih rualin chhungkaw puitling din tura rilru, tha leh sum an lo sen tawhna zawng zawng avangin inthlahrung tur a nih loh thu a sawi a. Kan inchhungkhur ah te leh khawtlang ah te thalai zawk ten kum lam a upate duat thiam a, zah thiam a, kan tun dinhmun min thlenpuitu an ni tih hre reng chunga zah tak a enkawl kan intihhmuh a pawimawh thu a sawi bawk.

Mizoram Upa Pawl (MUP) General Assembly vawi 50-na hi an pawl President Nghaklianmawia chuan a kaihruai a, General Secretary K.Thanmawia chuan report pein MUP member mi 1,804 boral te sunna hun hman a ni bawk a. He hunah hian MUP hmalakna hrang hrang tarlan niin chung zingah chuan Social Welfare & Tribal Affairs Department hnuaiah Zemabawk-ah Multi Service Centre Building sak mek a nih thu te, MUP Headquarters Building sak zawmna tur a ruahmanna a kal mek thu te leh Upa Pension Rs. 1000-a tihsan a nih thu leh Pension dawng mi 24,524 an awm mek thu te tarlan a ni.

He huna tarlan a nih danin Mizoram Upa Pawl (MUP) hi January ni 4, 1957 khan din a ni a, tun dinhmun ah General Headquarters 1 (Aizawl), District Headquarters 8, Area 90, Branch 589 leh member 70,102 an awm mek a. Mizoram pawn ah Branch pakhat leh Area 13 an awm bawk a ni.