Mizo thalai 2 ten Young Talented Artiste Award dawng

North East Zone Cultural Centre (NEZCC) buatsaih ‘Young Talented Artiste Award 2022-2023’ dawng turin Mizo pahnih, Rivca Lalnunsangi, Zotlang leh Jonathan VL. Remruata, Khawzawl te chu thlan an ni.

North East Zone Cultural Centre (NEZCC) hi Ministry of Culture, Govt. of India nena thawkho niin Young Talented Artiste Award hi kum 2002 atanga sem tan a ni a, Northeast State pariat atanga Artist te tana buatsaih a ni. He Award hi Northeast State hrang hranga kan Folk Art hrang hrang leh Material Culture a bo mai loh nana an buatsaih niin Young Talented Artiste Award 2022-2023 dawng tur hian Creative Arts (Painting) Category-ah Rivca Lalnunsangi d/o Lalchhandami Khiangte, Zotlang chu thlan a ni a, Painting Category-ah Jonathan VL. Remruata, s/o Masthangi, Khawzawl chu thlan a ni bawk a. He Award hian pawisa fai Rs. 20,000 leh Citation a kengtel a ni.

Young Talented Artiste Award hi India mi, Northeast State pariat zinga piang, kum 18 atanga kum 30 inkar tan a dil theih a. Folk Art hrang hrang heng- Lemziah (painting), Lem tuk (sculpture), Hnang tah (weaving/ carving), Thing hmanga lem tuk (wood carving), Hnam Lam (folk dance), Hnam zai (folk song), Hnam rimawi tum thiam (folk musician) etc. te tan a dil theih a ni. Art & Culture department hnuaiah emaw, mimal ang emaw a dil theih niin, artist te kuthnu thlalak mai bakah, an bio-data felfai tak leh an practice video thehluh tel a ni. Young Talented Artiste Award 2022-2023 hi Arunachal Pradesh, Assam, Manipur, Mizoram, Nagaland, leh Tripura atangin artist 17 in an dawng a. Kum 2022-23 a Application lut kha kum 2024-ah endik niin, kum 2025-ah Award Ceremony hi neih a ni. Shilpgram, NEZCC, Guwahati-ah April ni 8, 2025 khan Award hi sem a ni.