Lung in lirthei tlan lai a delh avangin chhungkaw pakhat a mi pathum an thih phah

Nimin April 28, 2025 tlai khan Lengpui Airport atanga Aizawl lam pana tlan Car pakhat chu Lengpui khaw dai-a Pukpui Tuikhawhthla bul lawkah kawngchhak atanga lung tlain delhin chhungkaw pakhat-a mi pathum ten nunna an chan a, mi pakhat in hliam a tuar bawk.

Thudawn danin nimin tlai dar 3:45 vel khan Aizawl lam atanga Lengpui thlen hma, Tuikhawhthla chhak deuh ah kawngchhak lam atanga lung lian tak rawn tla chuan kawng a tlan lai Car pakhat chu delhin he Motor hi a chhe hneh hle a, a bulhnaia awm ten a theih anga buaipui nghalin mi tlawmngai ten hun engemaw chen an buaipui hnuah he Motor-a chuang te hi lakchhuah theih an ni a, he Motor-ah hian mi 4 chuangin vanduaina thlenna hmun ah an zinga pathum te chu an boral nghal a, lirthei khalhtu hian hliam a tuar thung a ni.

He Motor-a chuang te hi chhungkaw pakhat a mi niin Aizawl Falkland Veng-a cheng te an ni a, nunna chan te hi chhungkaw pa ber Lalrinliana leh a nupui, Lungtiawii bakah an fanu, Vanlalhruaii (26) te an ni a, hliam tuar hi an fapa Lallawmzuala a ni thung. Thulakna pakhat in a tarlan danin Lalrinliana te chhungkua hian an chenna In tur sa tharin luahluh an tum avangin an fanu hnathawk-a Singapore-a awm leh an fapa Dehradun-a awm te chu an chah haw a, an nu leh pa bakah In lama awm an fapa upa ber te hian Lengpui Airport-ah lo hmuakin Dehradun atanga rawn haw an fapa hi Motor hran in a haw hmasa thung a, midang te hian vanduaina hi an tawk palh ta a ni.

He vanduaina thlenga nunna chan te ruang hi Lengpui khua chuan Kuang nen thlahin nizan khan an In thlenpui an ni a, hliam tuar Lallawmzuala hi Lengpui damdawi In panpui a nih hnuah Aizawl lam panpui niin lang thei mai ah chuan hliam na lutuk a tuar lo niin a lang.

Aizawl atanga Lengpui Airoprt panna kawng, Pukpui kham phei National Highway-44A hi lung tlak nasatna hmun a ni a, Rockfall Hazard Rating System (RHRS)-ah pawh 500 chuang niin India rama hmun hlauhawm pawl zinga chhiartel a ni tih thulakna pakhat chuan a tarlang bawk.