Roman Catholic Kohhran hotu lu Pope Francis a thi

Roman Catholic Kohhran hotu lu, Pope Francis chu nimin khan a boral a, kum 88-a upa a ni.

Vatican thuchhuah tarlan danin, Pope Francis hi April 21, 2025 (Easter Monday) zing dar 7:35 (local time) khan a chenna, Vatican-a Casa Santa Marta-ah a thi a. His Eminence, Cardinal Farrell chuan Pope thih thu hi puangin, “Kan Pa Thianghlim Francis-a thih thu lungngai takin ka puang a ni. A dam chhung zawng Lalpa leh A Kohhran rawngbawl nan a hmang zo a ni,” a ti a. Roman Catholic Kohhran dan angin Pope thih hnu ni 15-20 chhungin amah thlaktu tur hi thlan tur a ni ang.

Pope Francis (Cardinal Jorge Mario Bergoglio) hi Pope Benedict XVI-a'n hmun a kian hnuah, March 2013 khan Catholic Kohhran hruaitu lu ber atan thlantlin a ni a, amah hi Argentina a piang niin South America atanga Roman Catholic Kohhran hruaitu atan thlan a ni a, Argentina khawpui Beunos Aires-ah Bishop in a awm thin a ni.

Aizawl Bishop Most Reverend Stephen Rotluanga chuan Pope Francis chu kum 1936-ah lo piangin a nun pum chu Lalpa leh Kohhran tan a hmang zo tih a sawi a, Pope Francis chuan tumruhna leh huaisenna nunpui turin mitin a chah a, abik takin rethei leh chanhai te hnena hmangaihna lantir chu a thupui ber a ni tih sawi a, a thihna hi kohhran chuan thinlung takin an sun tih a sawi bawk a ni.

Prime Minister Narendra Modi chuan Pope Francis boral chu pawi a tih takzet thu leh lungngaihna thuk tak a neih thu sawiin, khawvel pum huap Catholic mipui te a tawrhpui thu X (Twitter)-ah a tarlang a, PM Modi chuan Pope Francis chu mi maktaduai tam tak tan ‘Khaw-ngaihna, inngaihtlâwmna, leh thlarau lam huaisenna entîrtu’ anga hriatreng a nih tur thu a sawi bawk.