Mizoram-ah World Veterinary Day 2025 hman a ni

Kumtin April thla Inrinni hnuhnung bera hman thin ‘World Veterinary Day’ pualin Inrinni khan 'Animal Health Takes a Team' tih thupui hmangin hun hman a ni.

AH&Vety Department, Mizoram State Veterinary Council leh Indian Veterinary Association (Mizoram) tangkawp buatsaiha Veterinary Polyclinic Hospital, Khatla-a World Veterinary Day 2025 puala hun hman ah hian AH&Vety Department-a Addl. Director (VS&PH) Dr. F. Lalramhluna chuan World Veterinary Day 2025 thupui atan 'Animal Health Takes a Team' tih chuan ran hriselna enkawl kawngah Veterinary Doctor mai bakah Veterinary Technician-te, Public Health lam a thawktute, ran chaw tha leh hrisel awm tura thawktu Agriculturist-te leh ran vulhtute tanrual leh thawhho a pawimawh zia a tarlan thu a sawi a. Ran leh mihring chu inzawmna thuk tak nei an nih angin ran hriselna chuan mihring hriselna pawh thui tak a nghawng thin thu sawiin, khawtlang hrisel siam tur chuan ran hriselna ngaih pawimawh hmasak tel a tul thu a sawi a ni.

Indian Veterinary Association (IVA) Mizoram Branch President Dr. Robert Rualthankhuma kaihhruai he hunah hian Free Anti-Rabies Vaccine pekna hun hman chhunzawm a ni a. He hunah hian ran 150 chuang vaccine pek a ni bawk. Tun dinhmunah Mizoram State Veterinary Council-ah hian member 405 an awm mek a, kumtin World Veterinary Day hi April thla Inrinni hnuhnung berah neih thin a ni a. Veterinary Doctor ten ran hriselna venhimna leh enkawlna kawnga infuihtharna hun atan leh a thlawna ran hriselna endikna hun atan hman thin a ni.