MSU Cup 2025 kharna Sports Minister in hmanpui

Mizo Students’ Union (MSU) buatsaih ‘MSU Cup 2025’ chu nimin khan zawhfel niin a kharna hun hi Sports Minister Lalnghinglova Hmar chuan a hmanpui a ni.

Aizawl Sipai Lammual-a MSU Cup 2025 kharna hunah hian Sports Minister chuan Zirlai nih chhung chuan zirna dah pawimawh hmasak ber a tul thu leh chutihrual chuan taksa hriselna leh rilru hriselna chu kalkawp tlat a nih avangin taksa sawizawi nana hun siam a pawimawh thu a sawi a. India in thlen a tum, Olympics 2036-ah Mizo thalai tam thei ang ber an tel theih nan Mizoram Sawrkarin Vision Olympics 2036 kalpui a tum thu pawh sawiin, National Games hnuhnung ber a Mizoram dinhmun enin infiamna discipline hrang hrangah hmalakna tur tam tak a awm thu a sawi bawk.

MSU Cup 2025-ah hian Aizawl District chhunga College 8 te an tel a. Football (Mipa), Volleyball (Hmeichhia) leh Cricket (Mipa) ah te inelna buatsaih a ni a. Govt. T.Romana College chu Football-ah an Champion a, Govt. Hrangbana College chu Volleyball leh Cricket-ah an Champion thung a ni.