Contractors ten kum upa zangnadawmna pek an phut

All Mizoram Contractors Association, General Headquarters chuan Contractor atana dah ngheh tawh te chu an lo upat a hna an thawh theih loh hunah Sawrkarin zangnadawmna a pek an phut tih an sawi.

Nimin-a Aizawl Press Club-a thuthar lakkhawmtute an kawmna ah All Mizoram Contractors Association hruaitute chuan sawrkara an thilphut hrang hrangte tarlangin, Contractor atana dahngheh tawh te chu an lo upat a hna an thawh theih loh hunah pension pek ve an duh thu leh Contractor an boral in sawrkarin ral ve tawh se an duh thu an sawi a. Hei bakah hian Contractor te tan Mizoram sawrkarin thlenna a neih Tourist Lodge-ah te, Inspection Bungalow-ah te, Mizoram House-ah te, Mizoram sawrkar Department hnuaia thlenin awm ah te a man zat ve-a thlen tir ve an duh thu te an sawi a ni.

Heng bakah hian Mizoram Sawrkarin Contractor-te tan hna chhuak apiangah 100-a 30 tal dah turin an phut a, Sawrkarin Contractor atana a pawm tawh chu Renew nghal tawh lovin kalpul turin an phut bakah Contractor te tan Tender an chhanin Earnest Money nghai lova chhan an phut a. Tender chhan a nihin dan ang taka chhan thlap an phut thu te; Tunhnaia Tender chhanna man to ta lutuk chu sawrkarin bithliah an duh thu te; PWD hnuaia Contractor te Department danga Contract hna Tender an chhang thei lo chu chhang ve thei se an duh thu te; Department hrang hrang hnuaia Contractor te pawhin PWD hnuaiah pawh Tender chhang ve thei se an duh thu te an sawi a.

Heng bakah hian Sub-Contractor te tan 100-a 25 Work Done neih theih chu 100-a 35-ah tihsan an duh thu te; Contract hna awmah Department Work a hna tam lutuk chu tihtawp an duh thu te; Contractor ten an hna thawh theih chin bithliah awmah an hna thawh theih chin bithliah a Contractor te zel Tender chhan tir an phut thu te; Contractor te hming hawh ah a hawhtuten Sub-Contract a hna an thawh Work done an lak dawnin a tira phalna lak kher ngai loin an thawh zawh hun hun ah Work done hi lak phalsak an duh thu te an sawi a. Tender a awmin a Form man sumdawnna ang maia sang tak taka lei ngai chu tihtawp vat an duh thu te; Tender a awmin a thawh hun chhung bithliah sa vek a nih avangin a thawktu tur te thlang mai lova rei tak tak a inchiah chuan hnathawh theih hun chhung a tihbuai theih avangin Tender chhan tawh te a thawktu tur thlan vat vat an duh thu te; Contractor kum 15-a an senior tawh chuan kaisan tir zel an duh thu te; Mizoram Contractor te tan Loan awlsam zawk leh hniam zawk a puk theihna dan sawrkarin siam se an duh thu leh Contractor te an lo boralin an aiawh tur an nupui fanaute an awm chuan an aiawh phal leh Tender lova duhsak zawng zawng hna in pek chu dan kalh a nih angin Tender ngei an duh thu te an sawi a ni.