Mizoram-ah lirthei ke hnih nei a pung chak ber

Mizoram sawrkar Transport Department chhinchhiah danin Mizoram chhunga lirthei pung chak ber chu lirthei ke hnih nei, Two Wheeler a ni.

Nikum December thla atanga kumin March thla chhung khan Mizoram chhunga Two Wheeler register thar zat chuan 18,062 a tling tawh a, hemi chhung vek hian LMV register pawh 2,930 a nih thu Transport Department hotute chuan an sawi a, an Department chhinchhiah danin, kumin March thla tawp thlengin Mizoram chhungah lirthei 3,32,440 register a ni tawh a, Lirthei register zingah hian lirthei ke hnih nei, Two Wheeler chu register tam ber a ni a, tun dinhmunah Mizoram pumah Two Wheeler 2,29,154 register tawh niin hemi dawt-ah hian mimal motor, LMV chu tam berin 55,313 register a ni tawh bawk. 

Transport Department-in an tarlan danin, tun dinhmunah Two Wheeler Taxi Mizoram pumah 4126 a awm mek a, passenger phur motor-te ke pali nei 5864 awm mekin passenger phur motor tho ke pathum nei chi 6359 register tawh a ni bawk a, heng bakah hian sumdawnna atana hman, motor lian bungraw phur chi 2,3,614 register tawh a nih bakah Car rental a tlan lirthei 350 a awm mek bawk. Transport Department-in thla hmasa thlenga Mizoram-a motor register tawh a chhinchhiahna-ah hian Mizoram chhungah Bus 566 awm mekin Ambulance 256 register a ni tawh bawk a, lei laihna lirthei, Excavator pawh a vaiin 1198 register a ni tawh bawk.