Mizoram-ah Pakistan mi awm lo; Venhimna ti khauh

Sawrkar laipui-in State hrang hranga Pakistan mi awmte huntiam chhunga chhuak vek tura a tih laiin Mizoram-ah chuan Pakistan mi an awm ve lo niin a lang.

Jammu & Kashmir-a Pahalgam khua a Pakistan atanga lo lut firfiakte'n April ni 23, 2025-a zinmi 26 zet an thah avang khan sawrkar laipui chuan Pakistan passport hmanga India rama la cham zawng zawng hnawhchhuah vek tura a tih avangin State danga Pakistan mi chambangte chu an ramah emaw, ramdang remchangah emaw kal tura hnawhchhuah mek an ni a. Mizorama he lam buaipuitu SP, CID (SB) Pisa-a Foreigners' Registration Office (FRO) a thawkte sawi dan chuan tun dinhmunah Pakistan mi emaw, Pakistan passport hmanga rawn zin emaw Mizoram-ah an awm lo a ni. FRO a thawkte chuan Pakistan leh ram thenkhat atanga Myanmar ramri hne a awm hmarchhak State 2, Manipur leh Nagaland ang bawkin Mizoram a lo lut turte chuan passport leh Visa bakah Protected Area Permit (PAP) an neih ngei ngei a ngai tawh a. Chutianga PAP nei, Pakistan atanga Mizorama lo lut leh tuna cham mek an awm an hriat loh thu an sawi a ni. 

Hetih lai hian Intelligence pawl hrang hrangte thurawn angin Jammu & Kashmir a firfiakte chetna rapthlak tak avang hian Mizoram sawrkar pawh venhimna lam khauh zawka ruahman tura hriattir a ni a. A bik takin nikum August thla bula an Prime Minister Sheikh Hasina an paihthlak hnu a buaina namen loh chhuah zuina Bangladesh ramri leh Myanmar ramri bakah thenawm Assam leh Tripura atanga firfiak lo lut thei an nih avangin uluk leh zuala venhimna kalpui a ni tawh a. Hei hi chhunzawm zel tura thurawn pek an ni.