Nikum-ah puipunna hmuna meizu man an tam

Nikum 2024 chhung khan Serchhip District chhungah meizuk phallohna hmuna meizu mi 103 man awmin an pawisa chawi tlingkhawm chu Rs. 6930/- a ni.

Serchhip CMO Office atanga LENKAWL in thu a dawn danin nikum (2024) January atanga December thla chhung khan Serchhip District Anti-Tobacco Squad te chuan COTPA Dan in vaihlo leh a kaihhnawih a khapna bawh-chhia an awm leh awm loh enfiahin Squad Drive tum 34 an nei a, heng ah hian puipunna hmuna meizuk khapna Dan bawhchhia mi 103 manin heng mite pawisa chawi tlingkhawm chu Rs. 6930/- a ni a. Hemi hun chhung hian zirna In-a vaihlo leh a kaihhnawih khapna chungchang inzirtirna tum 59 neiin Training tum 5 neih a nih bakah NGO hrang hrangah Awareness Campaign tum 8 neih a ni bawk.

Nikum chhung vek khan zuk leh hmuam nghei duh mi 248 ten District Hospital, Serchhip a Tobacco Cessation Clinic chu an pan a, heng te hi mipa 168 leh hmeichhia 80 niin an zinga a tam ber mi 161 te chu meizuk nghei duh te an ni a, zuk leh hmuam nghei mi 51 awmin mipa 27 leh hmeichhia 24 an ni bawk.