MZU dinchamphaphak lawmna leh Silver Jubilee lawm bultanna Governor hovin hman a ni

Mizoram University (MZU) dinchamphaphak lawmna leh Silver Jubilee lawm bultana chu nimin khan neih niin he hun hmanpuitu Governor General (Rtd) Vijay Kumar Singh chuan MZU chu Mizoram mai bakah North East-a zirna sang zawk tihhmasawn kawnga zirna in pawimawh a ni tih a sawi.

MZU Auditorium-a MZU)dinchamphaphak lawmna leh Silver Jubilee lawm bultana hunah hian Governor leh Chief Rector General Vijay Kumar Singh chuan MZU in kum 25-na hmel a hmu chu lawmawm a tih thu sawiin, MZU hnuaia Zirtirtu, thawktu leh zirlai awm tawh zawng zawngte chu hemi thleng tura mi pawimawh takte an ni tih a sawi a. MZU chu Mizoram mai bakah North East-a zirna sang zawk tihhmasawn kawnga zirna In pawimawh a ni tih sawiin, Zirna tihhmasawn nana hmanraw tha ber ber leh tunlai ber bera thuam a nih thu leh University Campus hmun mawi leh nuam, lehkha zir nana duhawm tak nei a ni tih a sawi a, hengte hian MZU chu thiam zirna hmun pawimawh bikah a siam niin a sawi.

Mizoram Larsap chuan tunhnaia MZU hlawhtlinna hrang hrangte tarlangin, Research paper 2,234 leh lehkhabu 868 tihchhuah a ni tawhte chu lawmawm a tih thu a sawi bakah Zirtirtu pakhat in naupang 10 zel vil anga chhut a ni te, Zirtirtu za zela 90 lai PhD nei an ni leh Teaching post za zela 94 lai hnawhkhah a ni thei chu chhuanawm a tih thu a sawi a. A awmnain a zir em avangin MZU chu Act East Policy tihhlawhtlin kawngah pawh a pawimawh dawn thu sawiin, South East Asian ramte nena inlaichinna tihchak zelna kawng ah leh thenawm ramte nena zirna leh hnam ziarangte inhriatpawhtawnna tura hmalaknaah MZU chu a la tangkai dawn thu a sawi bawk. 

MZU Silver Jubilee lawmna hi nimin atanga nakum April 25 thleng neih tura ruahman a ni a, nimin-a a bul tanna ah hian MZU Vice Chancellor Prof. DC. Deka chuan inlawmna thu sawiin, Khualzahawm Ambassador (Retd) Gurjit Singh chuan thu a sawi a. Silver Jubilee logo insiamsiak lawmman sem niin, MZU chanchin tarlanna Silde show thlirho a ni bawk.