Kum 2021 hnu lamah Mizoram-ah Cyber Crime kaihhnawihah mi 113 manin 40 thiamloh chantir an ni tawh

Mizoram Police te chuan kum 2021 atanga April ni 22,2025 thleng khan Cyber Crime kaihhnawih ah mi 113 manin mi 40 chu thiam loh chantir (convict) an ni tawh a, thubuai lut zingah hian sum leh pai-a inbumna kaihhnawih chu a tam ber a ni.

Mizoram Police -a hotute sawi danin kum 2021 khan Mizoram-a Cyber Crime Police te chuan mi 18 manin mi 9 te chu thiamloh chantir an ni a, kum 2022-ah mi 26 manin 17 tan tir an ni thung a, kum 2023-ah mi 32 manin 12 tan tir an nih bakah nikum 2024 khan mi 30 manin 2 te chu thianloh chantir an ni a, kumin kumtir atanga April 22 thleng khan mi 7 man tawhin thiamloh chantir erawh an la awm lo thung a ni. Mizoram Police te chhinchhiahna atanga a lan danin April 1, 2023 atanga March 31, 2024 chhung bik khan Cyber Crime Police Station chuan thubuai 17 ziaklutin mi 5 te chu thiamloh chantir an ni a, hemi hun chhung vek hian National Crime Reporting Portal kaltlangin thubuai 637 ziahluh a ni bawk. Cyber Crime Police chuan inbumna thubuaiah hian nikum (sawrkar kum) chhung khan inbumna thubuaia sum an hmuh let sak chu Rs. 99,48,196/- a tling a, Rs. 1,107,745.37/- chu NCRP-ah hren hrih a ni bawk.

Cyber Crime thawktute chuan sum leh pai inbumna zingah ‘Army Scam’ chu tam berin misualte hian sipai lemah changin tlawm deuh deuhin thil an zuar a, hrechiang lo ten pawisa pe in sum thahnem tak an hloh thin niin an sawi a. Hei bakah hian thil thawn tlan (khul) ngai a awm nia sawiin, mi tam tak sum an laksak thin niin an sawi bawk a. Heng misualte hian an pawis ate hi account hrang hrangah an thawndarh ngah zel a, hei bakah ATM hmanga an lakchhuah zung zung thin vangin hmuhlet bakah chhuichhuah an har a, chuvangin mipuite fimkhur a ngai hle niin an sawi a. Zawhna chhangin hetiang mi bum ching hi a tlangpuiin Bihar, UP leh Jharkhand vela misual an ni deuh ber niin an sawi bawk.

Sum kaihhnawih inbumna zingah mipat hmeichhiatna rawngkai (sextortion) hmanga mi vau chu a hluar hle niin an sawi bawk a. Misualte hian Video Call hmanga biain an mi biakte chu inphelruak turin an ti a, chu chu lo record-in a hnuah pawisa an pek loh chuan an sex video chu tih darhah an vau leh thin niin an sawi bawk a. Cyber Crime thawktute chuan Internet hmanga inbumna kaihhnawihah hian chawhrualin nitin FIR 20 vel dawng ang an nih thu an sawi a. Report lut lo engemaw zat a awm niin an sawi bawk.

Zalen zawhna chhangin Police hotute chuan, “Fimkhur tura mipui nasa taka kan ngen chungin kan case tam ber hi sum leh pai inbumna case a ni a. Chawhrualin nitin FIR 20 atanga 30 inkar dawng thin ang kan ni a. State pawn lam thil (inter state case) a tam avangin chhui a har thei hle a ni,” an ti a. Misual ten mi an bum dan tlangpui sawiin, “FB ah te thian atan sawmin an biak nel hnuah an thil thawn khulna tur pawisa te an dil a, mi tam tak chuan a tak tak emaw tiin sum an thawn a, mahse hmuh let a har tawh thin a. Hei bakah Bank Account number hrilh te awmin an sum an lo lakchhuak sak a. Sumdawnna thilah thawhpui tur anga insawia sum lo pe te, saruak thlalak thawna chumi hmanga vau let a sum dil te chu a langsar zual te an ni,” tih an sawi bawk.