Serchhip District-a MNF VC thlantlin te chawimawina hun buatsaih a ni
Serchhip District-a MNF VC te lawmpuina hunah hian Assembly-a Opposition Leader ni bawk Lalchhandama Ralte chuan MNF Party atanga VC Member thar te chu a lawmpui thu sawiin, an chungah mipuiten rinna leh beiseina nen an nghah thu leh thlemna tha lo karah rinawm tlat turin a fuih a. MNF Party te chu Ram leh hnam neitu an ni tih sawiin, “Engtiklai mahin kan inti mikhual thiang lo a. Tun dinhmunah insiamthatna hun leh hahchawlhna hun Pathian in min pe rih mai mai a ni. Nakin lawkah MNF Party chuan sawrkarna kan chang leh dawn a ni,” a ti bawk.
.jpeg)
MNF Vice President chuan ZPM chu nationalism kengtu nia insawi kha an nih thu sawiin, “An sawrkar hnuah nationalism nekpuar thil an thleng fo a, chutih hunah chuan hnam tana an din ngam lohzia a lang ta zeuh zeuh. Thil fuh lo a awmin sawrkar kal tawh an mawhpuh a, a tha lamah anmahni thawh angin an sawi leh thung. Mawhphurhna la ngam lo sawrkar kan hrawn mek a ni. Mizoram tana beitu pawl hrang hrang, NGO-ten he sawrkarah hian mak tih an ngah, an beidawng, an ring tawk lo mek. ZPM hi chhum reilo te lo langa ral leh tur ang hi an ni,” a ti a. ZPM chu opposition an nih lai khan sawrkar kalta zawng zawng tlin lohna leh hmelhemna kher chhuakin, Social Media-ah an rak chuah chuah tih sawiin, “Tha bik nia insawiin, Kohhran leh pawl dang behchhanin Pathian ram din tur anga intiam an ni. Sawrkar tawhte ang lo takin 'Kan ti ve lo ang' tih tiam an ngah hle. Mahse, an sawrkar hnuah enge thleng? Kan ti lo ang an tih apiang an ti a, an tih tur tiam an ti lo thung. Sawrkar kal tawh an selte ai mahin an fawm tawp a, party induhsak bikna kawngah nise a chena na an ni,” a ti bawk.
Nimin-a he hun an hman hi Serchhip East Block MNF President C. Lalrinfela chuan kaihruaiin Serchhip District chhunga Block hrang hrang Report ngaihthlak a ni a, Serchhip District-a MNF VC tling mi 61 te hnenah chawimawina hlan an ni.
.jfif)
Comments
Post a Comment
I ngaihdan i sawi hian mipui ngaihdan i tarlang a ni!