MZP ten hriatthiam har an tih thu an sawi

Mizo Zirlai Pawl (MZP) chuan Mizoram chhung ngeia Assam lamin thuneih an rawn tum fo chu hriatthiam har an tih thu sawiin, Ram humhalh turin theihtawp a dodal zel nise an ti.

Nimin-a thuchhuah an siamah MZP General Hqrs. chuan nimin khan Buhchangphai an tlawh thu tarlangin, niminpiah, April 23, 2025 (Nilaini)-a Assam Forest ten Buhchangphai khawchhûng Chhimluang, Ramthar zau panna leihlawn siam mêk chawlhsan tura an tih chu a hmunah an endik tih an sawi a. Buhchangphai khawchhung Chhimlung lui, Ramthar Zau panna Lei hi a that tâwk loh avângin Mizoram sawrkar chuan Minor Irrigation hnuaiah RCC Lei an siam mêk nia sawiin, Chhimluang lui lehlamah hian Buhchangphai khaw miten huan lo ram neiin ei leh bâr zawn nan an hmang hlawm tih an sawi a. Heng huan lo ram te hi Mizoram Land Revenue & Settlement Department hnuaiah LSC neiin, chhiah pawh Mizoram sawrkar hnuaiah an pê a. Buhchangphai VC ram pass nei engemaw zât an awm bawk niin an sawi.

Heng huan neitute mamawh Lei Mizoram sawrkar hnuaia dawh that mêk hi Assam Police leh Assam Forest ten niminpiah khan tlawhin, Assam ram chhûng nia sawiin, hna thawh mêk hi tâwpsan nghal turin an hriattîr bâkah Hailakandi DC chuan Stay Order a chhuah nghal bawk niin an sawi a. Hei vang hian helai hmun hi tlawh an nih thu leh Buhchangphai VC te nen thil thlen dan an sawiho thu an sawi a. Mizoram chhung ngeia Assam lamin thuneih an rawn tum fo chu hriatthiam har an tih thu leh Ram humhalh turin theihtawp a dodal zel nise an tih thu an sawi a ni.

Mizoram sawrkarin Mizoram ramri dep khuate hmasâwnna hna an thawk chu lâwmawm an tih thu pawh MZP chuan sawiin, hetianga State dangin ramri an rawn nêkna hi na taka chhanglet zêl turin an ngen tih an sawi a. Ramri dep khuaa hmasâwnna hnathawh leh hmalâkna hrang hrangah khawthlang hruaitute hriattîrin thawhpui thin se an duh thu an sawi a. Buhchangphai Chhimluang Ramthar kai-a lei dawh mêk hi a rang thei ang bera dawh zawh a nih theih nan hma an lak zel dawn thu leh Sawrkar hmalâkna pawh uluk takin an thlithlai zui dawn thu an sawi a ni.