ZPM in Term an hmang zo ang em tih inzawt niin sawi

MNF President Zoramthanga chuan ZPM chu ‘An term an hmang zo angem le?’ tiin mipui an inzawt mek niin a sawi.

Nimin khan Mamit Chhim Veng YMA Hall-ah Mamit District chhunga MNF VC tlingte chawimawina hun hman niin he hunah hian MNF President Zoramthanga chuan Mizoram-ah party hrang hrang thli alo tleh tawh thin tih sawiin, “Pathian in ZPM thli a tlehtir a, an hun atan ruat a ni. Mahse, midang sawrkar laia mipui zawhna ang a ni ta hauh lo, Congress leh MNF a sawrkar lai chuan ‘A dawtah an sawrkar leh angem le?’ tiin an inzawt thin a. ZPM sawrkar-ah chuan ‘Inthlan lehah an sawrkar leh angem le ti loin, an term an hmang zo angem le?’ tiin mipui an inzawt mek a ni,” a ti a. “Chuvangin, MNF hi lo chhuahsan lo ula, Pathian leh kan Ram tan titu party-te hi Pathian in min kaihruai zel dawn a, kan thuthlung hi nghet takin i vawng zel ang u,” tiin he huna kalkhawmte chu a fuih a ni.

MNF President chuan, Mizoram-ah party tam tak an ral tawh laiin, MNF chu kum 64 chuang an ni tawh tih sawiin, “Chuti chungin vawiin thlenga party ruhrel lian ber kan la ni thei hi kan theihna vang a ni lo. Hun harsa tak tak tawkin hniam takah awm thin mah ila, MNF theihna leh chakna vang niloin Pathianin min kaihruaiin min khaichhuak leh thin a ni.” a ti a. 'Pathian leh kan Ram tan' tih thupui leh thuthlung meichher vuan tlattu party an nihna chu vawng tlat turin a chah bawk.

MNF President chuan Mamit District atangin ZPM thlipui tleh kara MNF in VC member 145 zet an nei thei chu a lawmawm hle tih a sawi a. Heng mi 145 te bakah hian MNF VC siam thar an awmbelh avangin Mamit District-ah MNF VC member 150 an awm mek a ni.

Nimin-a he hun hman ah hian Hachhek Bialtu MLA Robert Romawia Royte pawhin thu a sawi bakah Social Media chungchang inzirtirna leh hman tangkai dan zirho a ni bawk.