CISF kutah Lengpui Airport venhimna hlan a ni

Lengpui Airport-a venhimna hna chu nimin khan Central Industrial Security Force (CISF) te kutah Mizoram DGP Anil Shukla chuan a hlan a, kum 1999 atanga Lengpui Airport venhim hna Mizoram State Police leh Central Reserve Police Force (CRPF) te’n an thawh chu CISF te kutah a awm dawn ta a ni.

 Lengpui Airport venhimna hna inhlan chhawnna pual hian nimin khan inkhawm tawi buatsaih niin Mizoram DGP Anil Shukla chuan CISF ten hna tha tak an thawh theih a duhsak thu sawiin, Lengpui Airport chu Mizoram leh ramdang inpawhna hmun pawimawh tak anih thu a sawi a. CISF in an enkawl tur chu venhimna kawngah rah tha a chhuah dawn tih sawiin, Mizoram himna leh hmarchhak State tan himna tam tak a thlen dawn niin a sawi. DGP chuan Mizoram chu State ralmuang leh nuam tak ni mahse tunhnaiah ruihhlo tawlh a hluar hle tih a sawi a, dan phalloh tawlhruk thil a tam avangin hemi kawnga hmala tur hian Mizoram Police ringawt an tawk lo a, CISF in Lengpui Airport-a venhim hna an thawk tur chuan kawng tam takah Mizoram Police hnathawh a pui dawn niin a sawi.

Lengpui Airport-a venhimna hna thawk tur CISF te hi Deputy Commandant pakhat hona hnuaiah mi 121 an rawn dah phawt dawn a. A hnuah a awm tur zat dik tak mi 214 an rawn dah dawn a. Tuna venhimna hna thawktu CRPF te hian nimin zing khan Lengpui Airport chhuahsanin helai hmuna awm thin Mizoram Police mi 70 vel te pawh nimin khan an chhuak a, mi 8 bawr vel nitin la duty in ILP enfiah hna an la thawk ang.

Kum 1999-a Indian Airlines thlawhna IC-814 suam a nih khan CISF in Airport an ven hi tha tih niin kum 2000-ah a hmasa ber atan Jaipur Airport ven hna an thawk a, tunah hian Airport 68-ah venhimna hna hi thawkin Airport thar pahnih veng turin an inbuatsaih leh mek bawk a ni.