MZP in Agenda 4 an pawm

Mizo Zirlai Pawl (MZP) chuan thla thar May 2 khian MZP Rorelna sang ber dawttu, Federal Council Sitting vawi 58-na an nei dawn a, tun tum a ngaihtuah tur hian Agenda pali chhawpchhuah a ni ang.

    Nimin khan MZP General Hqrs. chuan Aizawl-a MZP Conference Hall-ah Executive Meeting vawi 641-na neiin thla thar May 2-a Federal Council Sitting an neih tura Agenda rawtna lut hrang hrangte an thlifim a, heng atang hian MZP Federal Council Sitting a ngaihtuah tur hian pali pawm a ni a, ‘Mizoram in State University tha tak a neih theih nan, Mizoram State University Act 2025 hi MZP-in zirchianna neih a, a tul anga hmalak ni rawh se’ tih te; ‘Indo Myanmar Border hung tumna hian Zofate inpumkhatna atan harsatna a thlen dawn avangin MZP-in dodal zel ni rawh se’ tih te; ‘Zirtirtu aikal late lakah sawrkarin action a lak theih nan MZP-in hma la rawh se’ tih leh School thenkhat, sawrkar-a hlawh la ten Fee sang taka an la thin hi tihtawp a nih theih nan MZP in hma la rawh se’ tih te a ni.