Wine siam lamah awmze nei zawkin hmalak tan a ni

Agriculture Minister PC. Vanlalruata chuan Zu Khap burna dan ennawn a nih hnuiin Wine siamna lamah te pawh awmze nei zawkin hmalak tan a nih thu a sawi.

Nimin khan Aijal Club RB Mc Cabe Hall-ah ‘National Symposium and Consultative Workshop on production of Wine from Grapes and Fruits in Mizoram’ chu neih niin he hun hmanpuitu Agriculture Minister PC. Vanlalruata chuan Mizoram-ah theirah tam tak Wine a siam theih leh man man zawka sawngbawl theih theirah tam tak kan nei tih a sawi a. Sawrkarin kuthnathawktu te’n an thlai thar te atanga sum tam zawk an hmuh theih dan tur leh State sum thawhchhuah tihpunna tur kawng hrang hrang a ngaihtuah tih sawiin, “Zu Khap burna dan kumin ah ennawn a nih hnuiin Wine siamna lamah te pawh awmze nei zawkin hmalak tan a lo ni ta,” a ti a. Wine Sector-ah hma kan sawnna turin sawrkar angin Agriculture leh Horticulture te chuan kuthnathawktute tanpui turin a in hawng tih a sawi a, hhmalakna huangah National Symposium hial buatsaih a lo ni ta chu lawmawm a tih thu sawiin, he zirhona atangin hian Mizoram Wine Sector chuan hlawkna a neih ngei a beisei tih a sawi bawk.

Grape leh theirah thenkhat atanga Uaiin siam leh a kaihhnawih sumdawnna chungchang sawihona hi Mizoram Science, Technology & Innovation Council (MISTIC), Directorate of Science & Technology leh All India Wine Production Association (AIWPA) tangkawpin a buatsaih a ni a. He hunah hian Champhai leh Hnahlan Grape Grower Society member te bakah Horticulture Department official te, Agriculture Department official te, Science & Technology mi thiam te, Food & Drug Administration, H&FW official te, MISTIC  a Scientist te, Commerce and Industries official te, Food & Drug Administration official te, Tourism Department official te, India ram hmun hrang hranga Grape Growers, Wine Producer te, Wine enthusiast te leh sumdawng te an tel a ni.