Kolasib District-a Kuhva ro man sa tihral chungchang District Magistrate in a sawifiah

Kolasib District-a Kuhva man sa tihral nia sawi chungchang chu nimin khan Kolasib District Magistrate Robert C. Lalhmangaiha chuan thuchhuah siamin a sawifiah.

He thuchhuah a siamah hian Kolasib District Magistrate chuan tunhnaiah Polytechnic Building, Thingdawl-a Burma kuhva kum 2022 chho vel atanga man tawh dahkhawm tihral tumna ah Kolasib khawpui atangin thuthang belhchian dawllo lengvak a awm tih hriat a nih thu leh thu ziktluak hrechiang lova Social Media (Whatsapp leh Youtube etc.) vela thu thehdarh a awm chu pawi a tih thu a tarlang a. “Kolasib District chhungah leh Kolasib khawpui chhung hmun engemaw zatah Burma kuhva (Dry Myanmarese Arecanut) man sa, Kolasib District Court-in a chungthu a rel tawh hi dah an ni a. A tam ber chu Polytechnic Building, Thingdawl-ah dah an ni. He Polytechnic Building hi Higher & Technical Education Department hnuaia awm niin, tun hunah hian sak that leh thawm that (repair & renovation) kalpui tura ruahman a ni a. A khawihtu tur Contractor pawh ruat fel tawh niin kan hria. He Polytechnic building chung hi a pawp nasa hle a, hei avang hian a chhunga kuhva dah hi a chhe nasa tawhin, a mawih nasa hle tawh bawk. Kuhva rihna (weight) hian building himna hi a ti derthawng hle bawk a ni,” a ti.

Heng kuhva man sa leh an chungchang rel fel tawh, District Court in District Magistrate kuta tihral tura a dahfel tawhte hi a tihral dan tur District Administration leh Police lam chuan ngun takin an ngaihtuah thu tarlangin, “Phum bo emaw, halral emaw, paih emaw, CrPC leh kan dan thar BNSS-a (relevant section of CrPC/BNSS) District Magistrate thuneihna angin hralh emaw ngaihtuahin, a tha ber tur kan zawng a. Phum bo turin mimal/Govt. Department hmunhma remchang a awm lova, halral a nih chuan sum tam tak sen a ngaih dawn bakah environmental issue nasa tak a awm thei dawn a. Thehthanga paihdarh hian mi thenkhat lo chhar khawma sumdawnna atana hman tum an awm leh thei bawk a. Heng zawng zawng ngaihtuah hian kuhva chhia leh hlui, a dahna hmun tihruah ngai bawk si hi a chunga dan tarlan tlawhchhana, a lei thei tur hnena tihral mai hi District Magistrate chuan a thuneihna angin tha a ti a. Tunhnaiah All NGO Co-ordination Committee, Kolasib leh chanchinbumite nen pawh thu hrang hrang ngaihtuaha inkawmhona neih a ni a, he hunah hian District Magistrate hmalakna hi a thuphunga tarlan a ni a. District Magistrate thuneihna angin auction (lilam) hmanga tihral a ni ta a ni. A leitu hian Polytechnic Building-a kuhva dah mek hi phur chhuaka, a building a tihruah bakah, thenfai ngai thian faiin, felfai takin a hna a kalpui dawn a ni,” a ti.

Kolasib District Magistrate chuan an hmalakna ah hian thu ziktluak hrechiang hmasa lova ngaihdan lo siam mi engemawzat an awm nia a lan thu tarlangin, “Hengte hian hriatchian duh an neih chuan District Magistrate, Kolasib District hnenah emaw Bawrhsap Pisapui, Kolasib-ah emaw, Office hun chhunga rawn kal a, thu chiang rawn zawt hmasa turin kan inngen e,” a ti bawk.