Kolasib-ah DC hovin thukhawm

Nimin khan Kolasib-ah District Level Road Safety Committee chu an Chairman leh Bawrhsap Robert C. Lalhmangaiha hova thukhawmin Kolasib District chhunga lirthei avanga chet-sualna thleng thin te pumpelh theih dan turte leh lirthei khalhtuten dan zawma, an lirthei te him taka an khalh theihna tura hmalakna turte an thlirho a. He hunah hian Bawrhsap chuan Kolasib District kawng a that tak avanga lirthei speed pawh a san chhoh tak thu sawiin, motor khalhtute fimkhur tawk loh avangin lirthei chetsualna a thleng thin chu a pawi a tih thu a sawi a, lirthei accident a tlem zawk nan kawng hrang hranga inzirtirna leh hmalakna te neih a tul takzet tih a sawi bawk.