Thei, thlai leh ran lalut tur tan phalna lak a ngai

State dang atanga thei, thlai leh ran (animal husbandry products) la lut tur reng reng te chu sawrkar-ah phalna la tura hriattir an ni.

    Hemi chungchanga sawrkar thuchhuah chuan tunlai hian mi hrang hrangin thei leh thlai te State pawn leh ram pawn atangin an lakluh bakah, an duhna hmun hmunah motorin an zuar thin tih tarlangin, heng zingah hian zu leh ruihtheih thil danga inhnamhnawih pawh an awm ni a hriat a ni tih a tarlang a. Hei vang hian ‘The Mizoram Agricultural Products (Prohibition of Movement) (Amendment) Order 1999’ in a phut angin, State dang atanga thei, thlai leh ran (Animal Husbandry products) la lut tur reng rengin Commerce & Industries Department atangin permit form awmsa hmangin an dil zel tur a ni tih a tarlang a ni. Permit hi Directorate of Commerce & Industries (Marketing Cell) leh District Office, Commerce & Industries Department-ah te lak theih a ni a, permit la tur ten an mahni Voters' ID (EPIC) Xerox copy ken ngei tur a ni bawk. Permit nei hmasa lova heng bungrua te hi Mizoram chhunga lakluh tum an awm chuan he order, The Mizoram Agricultural Products (Prohibition of Movement) (Amendment) Order 1999 ang hian an chungah action lak a ni ang tih an tar-lang bawk a ni. Hrechiang duh tan Promotion Officer te hnenah zawhfiah theih a ni bawk.