Hotel leh Restaurant-ah Zu thahnem tak man

Mizoram Excise and Narcotics Department chuan Aizawl chhunga Hotel leh Restaurant hrang hrang an dapna ah Zu thahnem tak an man.

Excise Department hotute sawi danin Falkland Veng-a dawr pathum- Buzz Inn, Chopstyx leh Hotel Pot Grace restaurant bakah Thuampui-a Silver Spoon Restaurant leh Heritage Lounge Karaoke atangte in Zu hi an man a, heng hmunte hi an dap hmain hriattirna tihchhuah hmasak a nih thu leh chumi hnuah chauh Restaurant leh Hotel hi an dap tih an sawi a, Sap zu leh Beer thahnem tak bakah Rakzu litre 37 leh plastic bottle 37 zet an man a ni.

Mizoram Excise and Narcotics Department hian April 8 khan thuchhuah siamin Hotel, Restaurant, Club, Home Stay, Recreation Centre leh Picnic Spot thenkhatah anmahni dawrtute hnena phalna nei lova zu leh a kaihhnawih lam (Wine, Beer leh adangte.) chhawp thin leh ngaihtuah sak thin an awm tih hriat a nih thu leh chu chu MLP (Amendment) Act 2025 bawhchhiatna a nih avangin dapchhuah hna an thawk dawn tih an tarlang tawh a ni.