Malaria hmuhchhuah tamna ber Mizoram la ni

India ramah mi sang khat zel atanga Malaria vei hmuhchhuah zat atanga chhutin Mizoram chu Malaria vei tamna ber State a ni.

National Health Mission hnuaia National Vector Borne Disease Control Programme chuan nimin khan Dawrpui Multipurpose Centre-ah khawvel pum huapa Sikserh natna dona ni, ‘World Malaria Day’ an hmang a, he hunah hian Mizoram-ah Malaria natna a la hluar thu leh tun dinhmunah India ramah mi sang khat zel atanga Malaria vei hmuhchhuah zat, Annual Parasite Incidence (API) atanga chhutin Mizoram chuan Malaria tamna ber State nihna a la hauh chhunzawm mek thu leh Malaria dona kawnga tanlak a tul thute thawktute chuan an sawi a. Mizoram-ah hian kum 2023 khan Malaria vei mi 18,005 awmin mi 13 in an nunna an chan a. Nikum 2024 khan Malaria natna vei mi 16,899 awmin nunna chan mi 7 an awm bawk. Kumin 2025-ah hian March thla tawp thlengin Malaria vei hmuhchhuah mi 866 awmin nunna chan an awm lo thung a ni.

Nimin-a hun hman hi Health Minister Lalrinpuii chuan hmanpuiin Mizoram chu rampuma Malaria vei zingah a sang ber a la nih avangin kum 2027-a Malaria umbo vek hman turin kum 2 chauh a awm tawh avangin uar lehzuala theihtawp chhuah a tul tih a sawi a. Mizoram-ah chuan Mamit, Siaha, Lawngtlai leh Lunglei District te chu Malaria kai tam berte an nih avangin heng District hrang hranga Village Council te chu theihtawp chhuahpui turin a sawm a, Thosilen damdawi-a chiah zar kawngah te, thisen test leh damdawi ei kawngah te mipui fuih turin a ngen a ni.

World Malaria Day pual hian District zawng zawngah Malaria dona atana hmalakna hrang hrang kalpui niin; khawtlang mipui leh Pawl hrang hrang te nen Malaria chungchang inzirtira hun te neih anih bakah Source Reduction Drive (Thosi pian theihna tui tling tihbo hnatlang) te, Lo/Huan neitu te Malaria laka an him theihna tura hmalakna te kalpui a ni.