Chin Refugee Community aiawh ten MP an kawm

Chin Refugee Community a hnam hrang hrang aiawh mi 12 te chuan Inrinni khan Mizoram Lok Sabha MP Richad Vanlalhmangaiha chu New Delhi-a a chenna In-ah an kawm.

He inkawmna ah hian Lok Sabha MP Richad Vanlalhmangaiha chuan Myanmar atanga Mizoram-a kan unau raltlante atanga sawrkar phal loh ruihtheihthil tawlhrukna leh sualna dang dang lo thleng thin chu pawi a tih thu leh hetiang thil a thlen tawh loh nana venpui turin leh thawhpui turin Chin Refugee Community te hi a lo ngen a. Chin Refugee Community hruaitute pawn hetiang thil duhawm lo tak lo thleng thin chu pawi an tih thu leh Mizorama raltlante chu lo zirchianga dan bawhchhe zawnga raltlante pawh an awm tawh lohna tura theih tawp chhuah an tum thu MP hi an hrilh bawk a ni.

Chin Refugee Community te hian India ram chhunga an harsatna tawh dan hrang hrang te MP hi an sawipui bawk a, MP hian an harsatna te lo zirchiang a, a tul dan anga hma lo lakpui a tum thu alo hrilh bawk a ni. Tunah hian Delhi khawpui chhung ringawt ah hian Chin raltlan hi mi 7000 chuang an awm niin an sawi bawk.