MZP Hqrs. Lunglei ten Pukpui dai-ah ATL Road dangin Vawiin-ah Hrangchalkawn lamah dan leh an tum

Mizo Zirlai Pawl (MZP) Hqrs. Lunglei chuan an lo ruahman tawh angin nimin zing dar 7:00 atang khan Aizawl-Thenzawl-Lunglei (ATL) Road chu Lunglei Pukpui dai-ah an dang tan a, he thu buatsaih lai thleng hian kawng hi an la dan bakah Vawiin lam hian Hrangchalkawn lamah dan zui an tum nia thudawn a ni.

MZP te hian ATL Road siamna tur cheng vbc 90.69 chu ATL Road siam nan hman vek an duh laiin cheng vbc. 45.60 chauh dah a Mausen leh Pukpui inkar kawngpui kilometre 14 chin chauh siam nan Sawrkar in a dah chu an hriatthiam loh thu an sawi a, he sum ruahman hi pawtpeng lovin a vaiin ATL Road siam nan hman ni rawh se tiin sawrkar an phut a. A bang zawng Aizawl khawpui chhung kawngpui chhe thawmthatna atana hman tura pawhpen ni a sawi chu an duh loh thu an sawi bawk a. Heng an thilphut nawr nan hian Pukpui dai-ah ATL Road hi an dang ta a ni.

MZP Lunglei Headquarters President Johan Hmangaihzuala Ralte chuan, ATL Road siamna tur sum cheng vbc. 90.69 atangin cheng vbc. 44.80 pawhpen chu sawkarin dahlet se an duh ber tih sawiin, hei bakah hian ATL kawng chhe chin, Kanghmun South leh Kikawn inkar kilometre 70 vel a nih laia, Pukpui dai leh Mausen dai inkar, kilometre 14 chauh siam tum a ni chu an duh lo a, kawng siamna tur sum dahin a daihlohna pawh a tha thei ang bera siamsak turin an phut tih a sawi bawk.

Kawngpui dangtu MZP Hqrs. Lunglei hruaitute chuan nimin chawhma lam khan Mizoram sawrkar chuan MLA pakhat kaltlangin anmahni hi a dawr tih sawiin, sawrkar chuan ATL Road atana cheng vbc 90.69 chu a pumpui-a dah let a nih chuan kawng chhe kumhlun, Kanghmun South leh Lunglei inkar siamna a daih dawn chuang lo tih sawiin, chumi nge an duh CRRI mithiam te Estimate siam tira, sum ngai zat zat dah belh tih thlang turin a ti niin an sawi a. MZP chuan an Resolution siam tawh angin sum pawhpen dahlet bakah chumi in a daih bak siamna tur sum dah a nih tur thu ziaka dah turin sawrkar chu an phut tih an hrilh tih an sawi bawk. Hemi hnu nimin tlai khan MZP te hian thutkhawm nei lehin kawngpui an dan chu chhun-zawm zel nise an tih bakah Vawiin atang hian Lunglei chhimlam kawtchhuah, Hrangchal-kawn-ah kawngpui dan nise tiin an rel a ni.

Lunglei North leh Lunglei South Bialtu MLA te chuan nizan hmasa khan Chief Minister Lalduhoma chu hmuin Chief Minister chuan cheng vbc. 90-ah ngawr ngawr ngaihtuahna sen tur a nih loh thu a lo hrilh a. Tuna sum dah bakah hian Mausen - Kanghmun South chu CRRI ten an zirchiana Estimate an siam hnunah a tul ang zat zat dah an inhuam thu lo hrilhin CRRI te hi an rawn thlen thuai beisei a nih thu a lo hrilh bawk a ni.